Atyraý oblysynyń aýdanynda jańa mýzeı ashyldy

ATYRAÝ. QazAqparat - Atyraý oblysynyń Jylyoı aýdanynda Tuńǵysh Prezıdent kúnine oraı mýzeı ashyldy, dep habarlaıdy QazAqparat tilshisi.

Mýzeı ǵımaratynda eki ekspozıtsııalyq zal, eksponattardy qabyldaý jáne óńdeý bólmesi, kórme zaly, qyzmettik mamandardyń bólmeleri, aýdıtorııa,​ jádigerlerdi saqtaıtyn jáne sharýashylyq bólmeleri ornalasqan. Qazirgi tańda mýzeı qorynda​ 5365 jádiger saqtaýǵa alynǵan.

«Ózderińizge belgili, aýdandy taný eń aldymen, mýzeıden bastalady. Mýzeı arqyly aýdannyń belgili azamattaryn, aýdan tarıhyn bilýge bolady jáne bul, osy ólkeniń tarıhı-mádenı murasy saqtalatyn qasterli oryndardyń biri. Jylyoı aýdanynyń da ózindik maqtanyshy, qasıetti jerleri men tarıhı oryndary, ózgeden ózgeshe qundylyqtary barshylyq.

Sonyń ishinde, «Qazaqstannyń kıeli kartasyna» engen Jylyoıdaǵy Aqmeshit rýhanı-ımandylyq ortalyǵy, Araltóbe qorǵanynyń ózi bir tarıh. Jylyoı – Qarashúńgilden bastaý alǵan Qazaqstan munaıynyń qarashańyraǵy dep maqtanyshpen aıta alamyz. Osynaý rýhanı murany eldiń jadynda jańǵyrtyp, ulttyq qundylyqtarymyz ben baı tarıhymyzdy, óńirdiń tanymal tulǵalaryn, ótkeni men búgingisin nasıhattaıtyn, kópshilikke tanytatyn osyndaı asyl qazynalarymyz mýzeılerde saqtalýy tıis dep bilemin«, - dedi aýdan ákimi Azamat Beket.