Atyraý oblysynda jyl basynan beri 10 adam sýǵa ketti
2022 jylǵy 4 shilde 13:21

Atyraý oblysynda jyl basynan beri 10 adam sýǵa ketti

ATYRAÝ. QazAqparat – Atyraý oblysynda jyl basynan beri 10 adam sýǵa ketti. Onyń ishinde 3 adam shomylý maýsymy bastalǵan soń sýǵa batqan, dep habarlaıdy QazAqparat.

Oblystyq tótenshe jaǵdaılar departamenti azamattyq qorǵanys basqarmasynyń aǵa ofıtseri Arystanbek Túmenovtiń málimetine súıensek, ótken jylǵy statıstıkamen salystyrǵanda, sýǵa ketý deregi 66,6% azaıǵan.

«Sýǵa batyp ketýdiń negizgi sebepteri – ata-analardyń balalardy qaraýsyz qaldyrýy men jasóspirimderdiń eresekterdiń baqylaýynsyz óz betimen shomylýy. Bıylǵy jyl basynan beri Atyraý oblysynda 10 adam sýǵa ketti. Al, shomylý maýsymy bastalǵan 1 maýsymnan bergi bir aıda 3 adam sýǵa ketip, qaza tapty. Onyń ekeýi – kámeletke tolmaǵan bala. Al, ótken jyly 28 adam, onyń ishinde 10 bala sýǵa batyp, jantásilim etti. Byltyr tótenshe jaǵdaı departamentiniń qyzmetkerleri 4 adamdy, onyń ishinde 2 kámeletke tolmaǵan jasóspirimdi qutqaryp qaldy», -deıdi Arystanbek Túmenov.

Onyń aıtýynsha, oblystyń sý aıdyndarynda adam ólimin boldyrmaý maqsatynda tótenshelikter polıtsııa qyzmetkerlerimen, ákimdik ókilderimen birlesip, kúndelikti úgit-nasıhat jumystaryn júrgizip otyr.

Oǵan kún saıyn 273 adam, 44 avtokólik pen júzý quraldary tartylǵan.

«Shomylý maýsymy bastalǵaly beri Atyraý qalasyndaǵy, Jylyoı men Qurmanǵazy aýdanyndaǵy úsh sýdan qutqarý stansasynda jedel-qutqarý jasaǵynyń qyzmetkerleri táýlik boıy kezekshilikti atqarady. Bıyl oblystyń sý aıdyndarynda 238 aýmaqqa shomylýǵa tyıym salyndy. Shomylýǵa ruqsat etilgen jáne tyıym salynǵan oryndar Atyraýda 2gis qosymshasyna engizildi. Oqys oqıǵanyń aldyn alý úshin turǵyndarǵa qarapaıym qaǵıdalardy usynyp otyrmyz. Máselen, «Shomylýǵa tyıym salynady» degen belgisi bar aýmaqta sýǵa túsýge, júzý shekarasy kórsetilgen qalqyma belgilerdi kesip ótýge, kemege, qaıyqqa, sýdaǵy basqa da quraldarǵa jaqyndaýǵa, mas kúıinde, tekserilmegen jáne jabdyqtalmaǵan jerlerde shomylýǵa, júzýge arnalmaǵan zattarmen júzýge bolmaıdy. Qaıyqtardan, jaǵajaılardan, beketterden jáne osy maqsattarǵa beıimdelmegen basqa da oryndardan sýǵa sekirmeý kerek. Sý qoımasynda qaýipsizdik belgilerin óz betinshe alyp tastaýǵa, búldirýge nemese ornatýǵa tyıym salynady», -dep málim etti Arystanbek Túmenov.

Eske sala ketelik, buǵan deıin Atyraýda 2gis qosymshasyna sýǵa túsýge tyıym salynǵan aýmaqtar engizilgenin habarlaǵan bolatynbyz.


Uqsas jańalyqtar

Jańalyqtar

Úrdis

MURAǴAT