Atyraý oblysynda jol erejesin baqylaıtyn mobıldi qosymsha iske qosyldy
2022 jylǵy 2 mamyr 00:40

Atyraý oblysynda jol erejesin baqylaıtyn mobıldi qosymsha iske qosyldy

ATYRAÝ. QazAqparat – Atyraý oblysynda jol erejesin baqylaıtyn mobıldi qosymsha iske qosyldy, dep habarlaıdy QazAqparat.

Oblystyq polıtsııa departamenti bastyǵynyń birinshi orynbasary polıtsııa polkovnıgi Berik Amangeldiniń aıtýynsha, «Qorǵaý – Qaýipti júrgizýshi» mobıldi qosymshasy – jol erejesin tıimdi baqylaýǵa, jazany bultartpaý qaǵıdatyn saqtaýǵa arnalǵan avtomatty júıe.

«Mobıldi qosymshamen jumys isteý úshin polıtsııa qyzmetkerleri jańa úlgidegi 100 planshetpen jabdyqtaldy. Qazir oblys joldarynda ornatylǵan 1 224 myń avtomatty kamera bar. Onyń 51-i jol qıylystarynda, 153-i jelilik ýchaskelerde ornalasqan. Kameralardyń kómegimen jyl saıyn 120 myńǵa jýyq jol qozǵalysy erejelerin buzý jaǵdaılary anyqtalady. Endi «Qorǵaý – Qaýipti júrgizýshi» mobıldi qosymshasyna «Sergek» kameralary men jedel basqarý ortalyǵynyń málimetteri birden kórsetiletin bolady. Bul jol erejesin buzatyn kólik júrgizýshilerin jyldam anyqtaýǵa múmkindik beredi. Polıtsııa qyzmetkerleri planshet arqyly júrgizýshiniń qozǵalys orny týraly málimetti kóre alady. Onyń ishinde kólikti jalǵan nómirmen basqaratyn júrgizýshiler, tehnıkalyq baıqaýdan ótpegen nemese saqtandyrý polısinsiz kólik júrgizgender, ustaý qajettiligi týraly aqparat túsken júrgizýshiler, 10 mınýt ishinde eki nemese odan da kóp jol erejesin buzǵandar týraly málimetter bar», -deıdi Berik Amangeldi.

Onyń aıtýyna qaraǵanda, jańa úlgidegi planshetter patrýldik polıtsııa qyzmetkerleriniń qyzmet kezinde aqparattarǵa koljetimdiligin arttyrady. Kólik júrgizýshiniń de, polıtsııa qyzmetkerleriniń de ýaqytyn únemdeýge septigin tıgizedi. Basty artyqshylyǵy aıyppul týraly aqparat dereý ІІM derekter bazasyna túsedi.

Sondaı-aq, bul baǵdarlama buzýdan qorǵalǵan. Planshetter uıaly baılanys operatorlarynyń biriniń arnaıy arnasy arqyly málimetter bazasymen baılanys ornatady. Al, polıtseıler baǵdarlamaǵa kirip, hattamany joıa almaıdy.

Eske sala ketelik, buǵan deıin «Sergek» kameralarynyń kómegimen Atyraýda úsh aıda 97 qylmys ashylǵanyn habarlaǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT