Atyraý oblysynda jol apatynan bir adam mert bolyp, 8 adam aýrýhanaǵa tústi
2022 jylǵy 4 shilde 03:10

Atyraý oblysynda jol apatynan bir adam mert bolyp, 8 adam aýrýhanaǵa tústi

ATYRAÝ. QazAqparat – Atyraý oblysynda bir kúnde eki jol apatynan júrgizýshi mert bolyp, 8 adam aýrýhanaǵa tústi, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, keshe, 3 shildede eki jol apaty bolǵan.

«Jol-kólik apatynyń bireýi tańerteńgi saǵat 09.00-de «Dossor-Qulsary-Beıneý» avtojolynyń 105-shaqyrymynda «Niger» avtobýsy men «Toyota Camry»markaly kóligi soqtyǵysqan. Kólik apatynyń saldarynan avtobýs jol jıegine aýdarylyp qaldy. Avtobýstyń alty jolaýshysy ártúrli dene jaraqatyn aldy. Zardap shekken jolaýshylar jedel járdem brıgadasynyń kóligimen aýrýhanaǵa jetkizildi», dep habarlady departamenttiń baspasóz qyzmetinen.

Al, keshki mezgilde «Aqtóbe-Atyraý-Reseı Federatsııasynyń shekarasy» baǵytyndaǵy tas joldyń 590-shaqyrymynda taǵy bir jol-kólik oqıǵasy tirkelgen.

«Atalǵan joldyń boıynda «Lada Priora» markaly jeńil kóliktiń júrgizýshisi jyldamdyq rejımi men araqashyqtyqty saqtamaı, aldynda kele jatqan «KamAZ» júk kóliginiń artqy bóligine soǵyldy. Jeńil kólik soqqynyń ekpinimen joldyń qarsy jolaǵyna shyǵyp ketken. Sóıtip, qarsy baǵyttaǵy «Lada» markaly kóligimen túıisken. Jol-kólik apatynyń saldarynan «Lada Priora» kóliginiń rýlinde otyrǵan 22 jastaǵy júrgizýshi oqıǵa orynda mert boldy. Al, ártúrli dene jaraqatyn alǵan «Lada» kóliginiń júrgizýshisi men jolaýshysy oblystyq aýrýhanaǵa jetkizildi», -dep málim etti departamenttiń baspasóz qyzmetinen.

Qazir polıtsııa qyzmetkerleri eki jol-kólik apatyna qatysty tergep-tekserýdi bastady.

Oblystyq polıtsııa departamentiniń jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń málimetine súıensek, jol-kólik oqıǵalarynyń birneshe sebebi bar.

«Birinshiden, qarsy baǵyttaǵy jolaqqa shyǵý, ekinshiden, jaıaý júrginshilerdi qaǵý, úshinshiden, jol qıylystarynan ótý erejesin buzý, tórtinshiden, jyldamdyqty shamadan tys asyryp, araqashyqtyqty saqtamaý. Máselen, oblys aýmaǵynda jyl basynan beri jyldamdyqty shamadan tys asyrǵan 153 myńnan astam, qarsy baǵytqa shyqqan 130-dan astam, jaıaý júrginshilerge jol bermegen 800-den astam, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtalyp otyr», -deıdi Erlan Bıǵambaev.

Eske sala ketelik, budan buryn Atyraýda Gazel men avtobýs soqtyǵysyp, jolaýshylary aýrýhanaǵa jetkizilgenin habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT