Atyraý oblysynda jaıylymnyń 32 myńǵa jýyq gektary shegirtkege qarsy óńdeldi
2022 jylǵy 5 shilde 19:22

Atyraý oblysynda jaıylymnyń 32 myńǵa jýyq gektary shegirtkege qarsy óńdeldi

ATYRAÝ. QazAqparat – Atyraý oblysynda jaıylymnyń 32 myńǵa jýyq gektaryna shegirtkege qarsy hımııalyq óńdeý jumysy júrgizildi, dep habarlaıdy QazAqparat.

Agroónerkásip keshenindegi memlekettik ınspektsııa komıteti Atyraý obystyq aýmaqtyq ınspektsııasynyń bólim basshysy Ábıla Qazıevanyń málimetinshe, bıyl shegirtkege qarsy 31 900 gektar jaıylymǵa hımııalyq óńdeý júrgizilgen.

«Atyraý oblysynda shegirtkelerge qarsy jumysty uıymdastyrý maqsatynda jedel áreket etý shtabtary qurylyp, tıisti túsindirý jumystary atqaryldy. Jaıylymdyq aýmaqtyń 3 800 gektary ıtalıan prýsyna qarsy «Vanteks» pestıtsıdimen, al 28 100 gektar jer azıat shegirtkesine qarsy «Lokýstın», «Tarzan» pestıtsıdterimen óńdeldi. Shegirtke zııankesteriniń oshaǵyn anyqtaý úshin 16 GPS navıgator men planshetter paıdalanyldy. Bul jumysqa shtattyq birliktegi 16 avtokólik pen salanyń 40 mamany tartyldy. Oǵan qosa 6 jaldamaly avtokólik pen 14 anyqtaýshy qosymsha alynyp, deltaletterde 2 ushqysh pen 2 operator, jerústi búrikkishinde 1 operator men 1 júrgizýshi, barlyǵy 35 avtokólik pen 60 adam jumysqa jumyldy. Óńdeý jumystarymen eki merdiger kompanııa aınalysty. Máselen, «AvıaSıla» JShS 2 dana deltaletimen áýeden, Batys Qazaqstan oblysynda tirkelgen «Magtoksın» JShS bir atomaızerli búrikkish apparatymen jerústinen búrký ádisimen hımııalyq óńdeý jumysyn júrgizdi. Pestıtsıdterdiń bıologııalyq tıimdiligi 96-97 paıyzdy qurady», -deıdi Ábıla Qazıeva.

Onyń aıtýynsha, bıyl aýa raıyna baılanysty basqa da zııankesterdiń belsendiligi artqan. Máselen, Qyzylqoǵa aýdanynda jýsan kúıesi, barlyq aýdandar men qala mańynda shalǵyn men oshaǵan kóbelekteri keńinen taralǵan.

«Bıylǵy 10 maýsym kúni Aýyl sharýashylyǵy mınıstriniń 2015 jylǵy 30 naýryzdaǵy №282 buıryǵyna ózgeris engizilip, shalǵyn kóbelegi asa qaýipti zııandy organızmder tizimine engizildi. Endi shalǵyn kúıesine qarsy fıtosanıtarııalyq is-sharany júrgizý úshin jergilikti bıýdjet esebinen qarajat bólinedi. Sóıtip, oǵan qarsy hımııalyq óńdeý júrgiziledi», - dep málim etti Ábıla Qazıev.

Eske sala ketelik, buǵan deıin Atyraý oblysynda shalǵyn kóbeleginen 100-ge jýyq sharýashylyq zııan shekkenin , Atyraý oblysynda shalǵyn kóbelegine qarsy 4,5 myń gektar alqap óńdelgenin habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT