Atyraý oblysynda qus tumaýynyń tirkelýine baılanysty úı qustaryn egýge 6,2 myń doza vaktsına bólindi
2022 jylǵy 2 shilde 18:53

Atyraý oblysynda qus tumaýynyń tirkelýine baılanysty úı qustaryn egýge 6,2 myń doza vaktsına bólindi

NUR-SULTAN. QazAqparat – Qus tumaýyna qarsy shuǵyl sharalar qabyldaý maqsatynda qaýipti aımaqtardaǵy qustardy egýge 6 291 doza vaktsına bólindi. Bul týraly Aýyl sharýashylyǵy mınıstrliginiń baspasóz qyzmeti málim etti, dep habarlaıdy QazAqparat.

«Shuǵyl sharalar ótkizý (Qazaqstan Respýblıkasynyń aýmaǵynda jańadan anyqtalǵan asa qaýipti) jáne úı qustary arasynda ınfektsııanyń taralýyn boldyrmaý úshin QR AShM Veterınarııalyq baqylaý jáne qadaǵalaý komıteti respýblıkalyq qordan joǵary patogendi qus tumaýynyń qaýip tóndiretin aımaqtarynda barlyq qusty vaktsınatsııalaýǵa 6 291 doza vaktsına bóldi jáne 12 maman jumyldyryldy», - delingen vedomstvo aqparatynda.

Jalpy, respýblıkada bıyl 16 370 180 úı qusyn joǵary patogendi qus tumaýyna qarsy egý josparlanǵan. Ótken 6 aıda 6 028 810 qus egildi, bul – jyldyq jospardyń 37%-y.

Eske salsaq, 26 maýsymda «Aqjaıyq» memlekettik tabıǵı rezervatynyń terrıtorııasynda mekeme ınspektorlary qustardyń qyrylý faktisin tirkegen bolatyn. Kaspıı teńizinde shamamen 78 km qashyqtyqta DS-04, DS-01 jasandy araldar aýdanynda 1 myńnan astam óli shaǵala tabyldy. Qustardyń ólý sebebin anyqtaý úshin bıomaterıaldar alyndy. Veterınarııa boıynsha ulttyq referenttik ortalyqta ólgen qusqa zerthanalyq zertteýler júrgizilip, iriktelgen synamalarda qus tumaýynyń vırýsy anyqtaldy. Osy synamalar dıagnozdy qaıta rastaý úshin HEB (Ulybrıtanııa) referenttik zerthanasyna jiberildi.

Mınıstrlik málimetinshe, epızootııalyq monıtorıng úshin veterınarııa jónindegi ulttyq referenttik ortalyqtyń qyzmetkerleri múddeli memlekettik organdarmen birge joǵary patogendi qus tumaýyn boldyrmaý maqsatynda jabaıy qustardyń maýsymdyq qonys aýdarý joldarynyń perımetri boıynsha olardy atýǵa shyǵady.


Seriktester jańalyqtary

Jańalyqtar

Úrdis

MURAǴAT