Atyraý oblysynda balabaqsha múlkin talqandaǵan jasóspirimder kamera arqyly anyqtalǵan

2022 jylǵy 3 qazan, 20:57
Atyraý oblysynda balabaqsha múlkin talqandaǵan jasóspirimder kamera arqyly anyqtalǵan

ATYRAÝ. QazAqparat – Atyraý oblysynda balabaqsha múlkin talqandaǵan jasóspirimder beınekameralar arqyly anyqtalǵan, dep habarlaıdy QazAqparat tilshisi.

Oblystyq bilim basqarmasynyń baspasóz qyzmetinen málim etkendeı, Qulsary qalasyndaǵy «Qyzǵaldaq» blabaqshasynyń ǵımaratynda ornatylǵan beınebaqylaý kameralary tolyq tekserilgen.

«Kameralardaǵy jazba muqııat tekserildi. Sodan keıin beınejazba arqyly kámeletke tolmaǵan quqyq buzýshylardyń jeke basy anyqtaldy. Balabaqshalardy kúzetý máselesi baqylaýǵa alyndy», - dep habarlady basqarmanyń baspasóz qyzmeti.

Eske salsaq, oqıǵa Jylyoı aýdanynyń ortalyǵy – Qulsary qalasynda 1 qazanda bolǵan. Mektep jasyndaǵy jasóspirimder keshke taman «Qyzǵaldaq» balabaqshasyna jasyrynyp kirgen. Olar oıynshyqtar men gúlderdi shashyp, astan-kesteńin shyǵarǵan.

Oblystyq polıtsııa departamenti baspasóz qyzmetiniń málimetinshe, balabaqshadaǵy oryndyqtardy, oıynshyqtar men gúlderdi shashyp, búldirgen 9 jasóspirim ustalǵan. Olar – 6-7-synyp oqýshylary.

«Jylyoı aýdanynyń Qulsary qalasyndaǵy balabaqsha ishinde bolǵan quqyq buzýshylyq faktisine qatysty 6-7 synypta oqıtyn 9 oqýshy anyqtaldy. Olardyń ata-anasy aýdandyq polıtsııa bólimine shaqyrtylyp, QR Ákimshilik quqyqbuzýshylyq týraly kodeksiniń 127-babymen (Kámeletke tolmaǵan adamdy tárbıeleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý) jınaqtalǵan is-qujattar sotqa joldandy», - dep málim etti oblystyq polıtsııa departamentiniń baspasóz qyzmeti.


Uqsas jańalyqtar
Seriktester jańalyqtary

Jańalyqtar