Atyraý oblysynda alty aıda jol apatynan 40 adam mert boldy
2022 jylǵy 4 shilde 21:20

Atyraý oblysynda alty aıda jol apatynan 40 adam mert boldy

ATYRAÝ. QazAqparat – Atyraý oblysynda alty aıda 153 jol-kólik oqıǵasy tirkeldi. Jol apatynan 40 adam mert bolyp, 189 adam ártúrli dene jaraqatyn aldy, dep habarlaıdy QazAqparat tilshisi.

Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń deregine súıensek, bıyl jol-kólik oqıǵasy 21,4, qaza bolǵandar sany 60, dene jaraqatyn alǵandar sany 11,8 paıyzǵa ósip otyr.

«Atyraý oblysynda 6 aıda 153 jol-kólik oqıǵasy tirkeldi. Jol apatynan 40 adam qaza taýyp, 189 adam ártúrli dene jaraqatyn aldy. Jol-kólik oqıǵalarynyń birneshe sebebin aıtýǵa bolady. Birinshiden, qarsy baǵyttaǵy jolaqqa shyǵý, ekinshiden jaıaý júrginshilerdi qaǵý, úshinshiden jol qıylystarynan ótý erejesin buzý, tórtinshiden jyldamdyqty shamadan tys asyrý. Oblys aýmaǵynda jyl basynan beri jyldamdyqty shamadan tys asyrǵan 153 myńnan, qarsy baǵytqa shyqqan 130-dan, jaıaý júrginshilerge jol bermegen 800-den, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtaldy», - deıdi Erlan Bıǵambaev.

Onyń aıtýyna qaraǵanda, jol-kólik oqıǵalaryna Armenııa men Grýzııa Respýblıkasy, Reseı Federatsııasy sekildi shetelderde tirkelgen kólikterdiń de qatysy bar. Máselen, osy elderde tirkelgen kólikterdiń qatysýymen bolǵan jol-kólik oqıǵasynan 75 adam ártúrli dene jaraqatyn alǵan. Qazir Atyraý oblysynyń aýmaǵynda shetelde tirkelgen 30 myńǵa jýyq kólik bar.

«Bıylǵy bes aıda kólik rýline otyrǵan mas júrgizýshilerdiń kesirinen 8 jol-kólik oqıǵasy tirkeldi. Saldarynan eki adam qaza taýyp, 8 adam ártúrli dene jaraqatyn aldy. Patrýldik polıtsııa qyzmetkerleri 300-den astam mas júrgizýshini anyqtap, ákimshilik jaýapqa tartty. Al, jasópirimder ushyraǵan 23 jol-kólik oqıǵasynan 2 bala qaza taýyp, 30 bala ártúrli dene jaraqatyn aldy», - dep málim etti Erlan Bıǵambaev.

Qazir oblys aýmaǵymen ótetin joldarda kólik aǵyny kóbeıgen. Bul júrgizýshilerden saqtyqty qajet etedi.

«Máselen, respýblıkalyq mańyzy bar «Aqtóbe-Atyraý-Reseı Federatsııasynyń shekarasy» baǵytyndaǵy jolmen 9 myń, «Atyraý-Oral» jolymen 7 myń, «Dossor-Qulsary-Beıneý» 9 myń, oblystyq mańyzy bar «Atyraý-Inder» 5 myń avtokólik ótedi. Óńirdegi tas joldarda táýliktik aǵyn shamamen 9 myń avtokólikti qurap otyr. Atalǵan joldardyń deńgeıi 3-sanatqa jatqyzylýyna baılanysty táýligine 3 myń 500 kólikti ótkizý kózdelgen. Alaıda, bul joldarmen táýligine shamamen 5 myń 500 kólik ótetini tirkeldi. Osyǵan baılanysty qala syrtyndaǵy respýblıkalyq, oblystyq mańyzy bar «Aqtóbe-Atyraý-Reseı Federatsııasynyń shekarasy», «Atyraý-Oral», «Atyraý-Inder» tas jolyna jyldamdyq ólsheýge arnalǵan 3 kardon-statsıonarlyq qurylǵy ornatyldy. Bul joldarǵa taǵy osyndaı 14 qurylǵyny ornatý jalǵasyp jatyr. Atyraý qalasynyń aýmaǵynda 6 kardon-statsıonarlyq jyldamdyq ólshegish qurylǵysy iske qosyldy. Qala syrtyndaǵy joldarǵa avtomatty baǵdarlamamen jabdyqtalǵan úsh aıaqty jyljymaly qurylǵyny paıdalaný úshin merdiger mekememen birlesken jumystar atqaryldy», - deıdi jergilikti polıtsııa qyzmeti basqarmasynyń bastyǵy.

Eske sala ketelik, budan buryn Atyraý oblysynda jol apatynan bir adam mert bolyp, 8 adam aýrýhanaǵa túskenin jazǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT