Atyraý oblysynda ákimdiktiń apparat basshysy qyzmetinen bosatylatyn boldy
2022 jylǵy 27 qańtar 01:28

Atyraý oblysynda ákimdiktiń apparat basshysy qyzmetinen bosatylatyn boldy

ATYRAÝ. QazAqparat – Atyraýda zańnama talabyn buzǵan sheneýnik qyzmetinen bosatylatyn boldy, dep habarlaıdy QazAqparat.

Oblystyq Ádep jónindegi keńestiń otyrysynda birneshe tártiptik is qaralyp, laýazymdy tulǵalar jazalandy.

Máselen, Mahambet aýdany ákimi apparatynyń basshysy eńbekke ýaqytsha jaramsyz paraǵyn ashtyrǵan.

Biraq soǵan qaramastan qyzmettik avtokóligin zańsyz paıdalanǵan. Sheneýniktiń buǵan deıin alynbaǵan tártiptik jazasy bolǵany anyqtaldy.

Munyń bári – zańnama talaptaryn buzý. Sol sebepten Ádep keńesi ákim apparatynyń basshysyn atqaratyn laýazymynan bosatý týraly usynys engizip otyr.

«Atyraý oblysy boıynsha tekserý komıssııasynyń basshysy ózi basqaratyn ujymda iskerlik jáne tilektestik ózara qarym-qatynasty ornata almaýy saldarynan synǵa ilikti. Oǵan «qatań sógis» túrindegi tártiptik jaza qoldaný usynyldy. Atyraý qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysyna qaramaǵyndaǵy qyzmetkermen qarym-qatynas ornatý kezinde dórekilikke jol bergeni úshin «eskertý» túrindegi tártiptik jaza qoldaný týraly sheshim qabyldandy», -dep habarlady oblystyq memlekettik qyzmet isteri jónindegi departamenttiń baspasóz qyzmeti.

Sondaı-aq, Inder aýdany ákimdiginiń laýazymdy tulǵalary Esbol aýyldyq okrýgi ákiminiń tártiptik jazasyn merziminen buryn negizsiz alyp tastaǵan.

Onymen qoımaı okrýg ákimine 656​ 609 teńge kólemindegi syıaqyny zańsyz bergen.

Eske sala ketelik, buǵan deıin Atyraýda 6 mln teńgeni jymqyrǵan mektep dırektory sottalǵanyn jazǵan edik.


Avtor:
Tilshi

Jańalyqtar

MURAǴAT