Atyraý oblysynda 2 myńǵa jýyq jumyssyz adamdy oqytýǵa 158 mln teńge bólindi
2022 jylǵy 6 shilde 19:11

Atyraý oblysynda 2 myńǵa jýyq jumyssyz adamdy oqytýǵa 158 mln teńge bólindi

ATYRAÝ. QazAqparat – Atyraý oblysynda 2 myńǵa jýyq jumyssyz adamdy oqytýǵa 158 mln teńge bólindi. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetov málim etti, dep habarlaıdy QazAqparat.

Basqarma basshysynyń aıtýynsha, bıyl 918 adamdy jumysshy mamandyǵyna oqytýǵa jergilikti bıýdjet esebinen 158,6 mln teńge qarastyrylyp otyr.

«Bıyl oblysta jumyssyz júrgen 918 adamdy 11 mamandyq boıynsha qysqa merzimdi kýrsta oqytý josparlandy. Buǵan qosa «Teńizshevroıl» JShS-niń qarajaty esebinen 1 myń adam oqytylady. Osyǵan baılanysty 4 shildede oblystyq jumyspen qamtýdy úılestirý jáne áleýmettik baǵdarlamalar basqarmasy men «Teńizshevroıl» JShS arasyndaǵy kelisimge sáıkes, «APEC PetroTechnic» kolledjinde jumysshy mamandyqtaryna qysqa merzimdi oqytý úshin Atyraý qalasy men barlyq aýdanda jumyssyzdardy irikteý jumystary bastaldy. Qysqa merzimdi kýrstar «APEC PetroTechnic» kolledji, «Aqtaý», «ILT» oqý ortalyqtarynyń oqý oryndarynda qurylys aǵashtaryn montajdaýshy, jumysshy-betonshy, qalyptaýshy jáne armatýrshy, qubyr montajdaýshy, metall konstrýktsııalaryn montajdaýshy, elektromontajdaýshy, qubyrlardy dánekerleýshi, metall konstrýktsııalaryn dánekerleýshi, boıaýshy, oqshaýlaýshy jáne taǵy basqa mamandyqtar boıynsha oqytylady», -dep málim etti Azamat Mámbetov.

Onyń aıtýyn qaraǵanda, irikteýden ótkender 6-9-shi shildede «APEC PetroTechnic» kolledjinde testileý jumystaryn tapsyrady. Qazir 61 adam bıýdjet esebinen qysqa merzimdi kýrsta jumysshy mamandyqtary boıynsha oqýdy bastady. «Teńizshevroıl» JShS-niń qoldaýymen uıymdastyrylǵan oqýǵa jumyssyzdardy irikteý qala men barlyq aýdandarda júrgizilip jatyr.

Eske sala ketelik, budan buryn Teńiz ken ornynda 7 myń jumysshy ózge jobalarǵa jumysqa alynatynyn habarlaǵan bolatynbyz.

Avtor: Bek Mustafa


Uqsas jańalyqtar
Seriktester jańalyqtary

Jańalyqtar

Úrdis

MURAǴAT