Atyraý aspanyn torlaǵan tútin oshaǵyn izdeýge tikushaq tartyldy
ATYRAÝ. QazAqparat – Atyraý aspanyn basqan tútinniń oshaǵyn izdeý úshin áýeden barlaýǵa tikushaq tartyldy, dep habarlaıdy QazAqparat tilshisi.
Oblystyq Tótenshe jaǵdaılar departamentiniń qoǵammen baılanys tobynan málim etkendeı, órt oshaǵyn anyqtaý maqsatynda búgin tikushaq tartýǵa sheshim qabyldandy.
«Atyraý qalasynyń aýmaǵynda tútin ıisiniń shyǵýyna baılanysty órt oshaqtaryn anyqtaý úshin áýeden barlaý júrgizýge «QazAvıaQutqarý» AQ-nyń MI-874 tikushaǵy jumyldyryldy. Tikushaq bortynda oblystyq Tótenshe jaǵdaılar departamentiniń qyzmetkerleri men jergilikti atqarýshy organdardyń ókilderinen quralǵan komıssııa músheleri bar. Olar tikushaqpen aerovızýaldy zerdeleý jumystaryn júrgizýde», - dep habarlady departamenttiń qoǵammen baılanys tobynan.
Budan bólek, Atyraý oblystyq Tótenshe jaǵdaılar departamentinen órt oshaǵyn anyqtaýǵa 15 qyzmetker men 3 tehnıka tartyldy.
Eske sala ketelik, buǵan deıin Atyraýda aýada turǵan tútinniń oshaǵy eki kúnnen beri anyqtalmaı jatqanyn habarlaǵan bolatynbyz.
Atyraý qalasynyń turǵyndary áleýmettik jelide tútinniń ıisi 29 qańtardan bastap sezilgenin aıtýda. Al búgin, 31 qańtarda tútinniń ıisi qatty bilinip tur.
«Departamenttiń jedel kezekshisi 30 qańtarda «Aqjaıyq» memlekettik tabıǵı rezervatyna telefon arqyly habarlasty. Alaıda, rezervat aýmaǵynda eshqandaı órt oqıǵasy tirkelmegeni belgili boldy. Al «Qazaqstan Ǵarysh Sapary» AQ-nyń ǵaryshtyq monıtorıngi arqyly áýeden barlaý kezinde Atyraý oblysynyń aýmaǵynda órt oshaqtary anyqtalǵan joq. Oblystyń barlyq aýdanynda da órt deregi tirkelmegen», - dep habarlaǵan edi departamenttiń qoǵammen baılanys tobynan.
Foto: Rýslan Kýmıskalıev
