Aty ańyzǵa aınalǵan telejúrgizýshi Larrı Kıng ómirden ótti

NUR-SULTAN. QazAqparat – Aty ańyzǵa aınalǵan telejúrgizýshi Larrı Kıng 87 jasynda ómirden ótti. Jyl basynda odan koronavırýs anyqtalyp, aýrýhanaǵa jatqyzylǵan edi. Onyń qaıtys bolǵany týraly habar senbi kúni Tvıtterdegi jeke paraqshasynda jarııalandy, dep habarlaıdy QazAqparat.

Loýrens Harvı Zeıger (Larrı Kıng) 1933 jyly Brýklınde eýreı otbasynda dúnıege kelgen. Onyń áke-sheshesi din ustanatyn jandar bolǵanymen, ózi óse kele agnostık boldy.

Áıgili telejúrgizýshi 60 jyl qyzmet atqardy. Onyń teń jartysyna jýyq ýaqyt Sı-en-en telearnasynda óziniń avtorlyq baǵdarlamasyn júrgizdi.

Kıng álemge tanymal saıasatkerlerden, shoý-bıznes juldyzdarynan, ataqty sportshylardan suhbat aldy.

Tikeleı efırde shyǵatyn Larry King Live tok-shoýyn dáýrendep turǵan kezinde bir túnde 1,5 mıllıon kórermen tamashalaıtyn bolǵan.

Bul baǵdarlamanyń eń sońǵy bólimi 2010 jyly shyqty. Sol mezette Larry King Live tarıhta júrgizýshisi eń uzaq ýaqyt aýyspaǵan telebaǵdarlama retinde rekord ornatyp, Gınnes rekordtar kitabyna endi.