Ataýly áleýmettik kómektiń 45 paıyzyn Shymkent pen Túrkistan oblysyndaǵy otbasylar alyp otyr
2022 jylǵy 27 mamyr 14:48

Ataýly áleýmettik kómektiń 45 paıyzyn Shymkent pen Túrkistan oblysyndaǵy otbasylar alyp otyr

NUR-SULTAN. QazAqparat – 1 mamyrdaǵy jaǵdaı boıynsha Qazaqstanda 111,4 myń otbasy nemese 557,1 myń adam 18,8 mlrd teńgege ataýly áleýmettik kómek alǵan. Bul týraly QR Eńbek jáne halyqty áleýmettik qorǵaý mınıstrligi áleýmettik kómek departamentiniń dırektory Asqar Nııazov aıtyp berdi, dep habarlaıdy QazAqparat tilshisi.

«Ataýly áleýmettik kómek kórsetý máselesi únemi Eńbek mınıstrliginiń baqylaýynda. Memleket basshysynyń tapsyrmasyna sáıkes 2020 jyldan bastap AÁK kórsetý mehanızmi óziniń klassıkalyq modeline qaıta ózgertildi. Ol birinshi kezekte kómek kórsetýdiń aıqyndylyǵyn, ádildigin, eńbekke degen motıvatsııasyn kóterýge baǵyttalǵan. 2020 jyldan bastap kórsetilip otyrǵan AÁK-tiń negizgi ereksheligi – aqshalaı kómekpen qatar, 1-6 jasqa deıingi balasy bar, turmysy tómen otbasylarǵa áleýmettik toptama berý de qarastyrylǵan», - dedi A. Nııazov Ortalyq kommýnıkatsııalar qyzmetinde.

Spıker AÁK-tiń ýaqytsha kómek ekenin atap ótti.

Onyń eń birinshi maqsaty – turmysy tómen otbasylardyń eńbekke qabiletti múshelerin jumysqa ornalastyrý, óz isin ashýǵa yntalanǵan otbasylarǵa granttar berý, kásipkerlik bastamalardy qoldaý, qajet bolǵan jaǵdaıda biliktilikti arttyrý kýrstaryna jiberý arqyly kedeılikten shyǵarýǵa kómektesý.

«Bul rette 2021 jyldyń qorytyndysyna sáıkes, 198,4 myń otbasy, onyń quramynda 1 mıllıonǵa jýyq adam ataýly áleýmettik kómekpen qamtyldy, onyń ishinde 160,6 myń otbasy shartty túrde AÁK alǵan, 37,8 myń otbasy shartsyz AÁK qol jetkizdi. 2020 jyly AÁK tólem júrgizýge 65,6 mlrd teńge jumsalǵan. Onyń 57,5 mlrd teńgesi respýblıkalyq bıýdjetten qarastyrylsa, 8,1 mlrd teńgesi jergilikti bıýdjet esebinen júrgizildi», - dedi A. Nııazov.

Óńirlik bóliniste 2021 jyldyń qorytyndysy boıynsha AÁK alýshylardyń kóbi Shymkent qalasynda – 47,2 myń otbasy (23,8%), Túrkistan oblysynda – 42,9 myń otbasy (21,7%) jáne Almaty oblysynda – 22,6 myń otbasy (11,4%) ekeni baıqalady.

AÁK alýshylar sany eń az óńirler – Soltústik Qazaqstan oblysy – 2,7 myń otbasy (1,3%) jáne Atyraý oblysy – 1,6 myń otbasy (0,8%).


Jańalyqtar

MURAǴAT