FÝTBOLDAN ÁLEM ChEMPIONATY-2022
  Jańalyqtar  >

Asyraýshysynan aıyrylǵan otbasyna qandaı kómek kórsetiledi

2022 jylǵy 3 qazan, 17:50
Asyraýshysynan aıyrylǵan otbasyna qandaı kómek kórsetiledi

ASTANA. QazAqparat - Elimizde asyraýshysynan aıyrylǵan otbasyna memleket tarapynan beriletin áleýmettik tólem bar. Bul járdemaqyny alýǵa Qazaqstan azamattarynan bólek, elimizde turatyn sheteldikter men azamattyǵy joq adamdar da quqyly. Bul tólem qalaı tólenedi? Járdemaqy kólemi qansha? Áleýmettik tólemge ótinish berý úshin qandaı qujattar kerek? Bul týraly tolyǵyraq QazAqparat sarapshysynyń materıalynda.

Eńbek jáne halyqty áleýmettik qorǵaý mınıstrliginiń málimetinshe, qyrkúıektegi jaǵdaı boıynsha asyraýshysynan aıyrylǵandar sany 180,1 myń adamǵa jetken. Asyraýshysynan aıyrylý jaǵdaıy boıynsha járdemaqy mólsheri qaıtys bolǵan (qaza tapqan) asyraýshynyń asyraýyndaǵy adam sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómengi kúnkóris deńgeıine baılanysty esepteledi. Aıta keteıik, asyraýshysynan aıyrylǵan jaǵdaıda memleket tarapynan taǵaıyndalatyn áleýmettik tólemderge Qazaqstan azamattarynan bólek, elimizde turatyn sheteldikter men azamattyǵy joq adamdar da quqyly. Eger ol birneshe memlekettik járdemaqy alýǵa quqyly bolsa, (múgedektigi, jasy jáne t.b.), onda memleketten tek bir ǵana járdemaqy taǵaıyndalady.

Asyraýshysynan aıyrylǵan jaǵdaıda áleýmettik tólem kimge jáne qalaı tólenedi?

- balalarǵa (asyrap alynǵan balalaryn, ógeı balalaryn jáne ógeı qyzdaryn qosqanda), qaıtys bolǵan asyraýshydan bólek eńbekke jaramdy týysy joq, on segiz jasqa tolmaı múgedek bolyp qalǵan aǵalary, apa-sińlileri men nemerelerine, alıment almaıtyn ógeı balalaryna;

- zeınetke shyqqan ákesi, sheshesi (asyrap alýshylardy qosa alǵanda), áıeli, kúıeýine;

- qaıtys bolǵan asyraýshynyń segiz jasqa tolmaǵan balasyn baǵatyn eńbekke jaramdy aǵasyna, ápkesine, ata-anasy nemese ata-ájesine;

- kúnkóriske jetkilikti qarajaty joq zeınetke shyqqan atasy men ájesine.

Aıta ketetin jaıt, asyraýshysynan aıyrylǵan kámelet jasyna tolmaǵan balany basqa bireýler asyrap alǵan jaǵdaıda da, ol járdemaqy alý quqyǵyn saqtaı alady. Buǵan qosa, kolledj ben ýnıversıtette oqıtyn otbasy músheleri 23 jasqa tolǵanǵa deıin áleýmettik tólem alýǵa quqyly. Al ata-anasynan aıyrylǵan bala úshin járdemaqy onyń resmı ókiline beriledi.

Áleýmettik tólem mólsheri otbasy músheleriniń sanyna qaraı tıisinshe ulǵaıtylady nemese azaıtylady. Sondaı-aq, otbasy músheleriniń sany ózgergen jaǵdaıda esepteý qaıta jasalady. Asyraýshylardyń ıaǵnı ata-ananyń ekeýi de qaıtys bolǵan jaǵdaıda, tólem onyń balalaryn asyrap alýshyǵa (qamqorshyǵa) tólenedi.

Járdemaqy kólemi qansha?

Asyraýshysynan aıyrylǵandarǵa aı saıynǵy járdemaqy eń tómengi kúnkóris deńgeıine sáıkes taǵaıyndalady. Járdemaqy mólsheri eńbekke jaramsyz otbasy músheleriniń sanyna qaraı bekitiledi. Tolyǵyraq tómendegi sýretten tanysa alasyzdar.

Áleýmettik tólemge ótinish berý úshin qandaı qujattar kerek?

- jeke basty kýálandyratyn qujat (jeke kýálik, azamattyǵy joq adamnyń kýáligi, sheteldiktiń QR-da turýǵa yqtııarhaty) nemese qandas mártebesi bar adamdar úshin qandas kýáligi - jeke basyn sáıkestendirý úshin talap etiledi;

- asyraýshynyń qaıtys bolǵany týraly kýálik nemese adamdy habar-osharsyz ketti dep taný týraly nemese qaıtys boldy dep jarııalaý týraly sottyń sheshimi;

- qaıtys bolǵan (sot habar-osharsyz ketti dep tanyǵan nemese qaıtys boldy dep jarııalaǵan) adammen týystyq qatynastardy rastaıtyn qujattar, balanyń (balalardyń) týý týraly málimetteri, qaıtys bolǵan asyraýshynyń konsýldyq legalızatsııasy ne arnaıy shtampy (apostıly) bolǵan kezde shet memleketterdiń quzyrly organdary bergen balanyń Qazaqstan Respýblıkasynan tys jerde týýyn tirkeý týraly jáne neke (erli-zaıyptylyq) jáne nekeni buzý týraly, asyrap alý týraly, áke (ana) bolýdy belgileý týraly kýálikter;

- on segiz jastan jıyrma úsh jasqa deıingi otbasy músheleriniń bilim alatyny nemese kúndizgi oqý nysanynda bilim alatyny týraly orta, tehnıkalyq jáne kásiptik, orta bilimnen keıingi, joǵary jáne (nemese) joǵary oqý ornynan keıingi bilim berý uıymdarynan alynǵan anyqtamalar (jyl saıyn jańartylady);

- qamqorshy nemese qorǵanshy belgileý týraly qujat;

- bankterde jáne (nemese) bank operatsııalarynyń jekelegen túrlerin júzege asyratyn uıymdarda ashylǵan bank shotynyń nómiri.

Járdemaqy qansha ýaqyt ishinde taǵaıyndalady jáne qaıda júginý kerek?

Turǵylyqty jerdegi «Azamattarǵa arnalǵan úkimet» memlekettik korporatsııasynyń bólimshesinde 3 kúntizbelik kún ishinde qyzmet kórsetiledi. Taǵaıyndaý merzimi ótinish berýshi memlekettik korporatsııaǵa barlyq qajetti qujattarmen tirkelgen kúnnen jáne áleýmettik tólemdi taǵaıyndaýǵa kelisim alǵan kúnnen bastap segiz jumys kúninen aspaıdy. Qyzmetti onlaın rejıminde Qazaqstan Respýblıkasynyń «Egov» elektrondyq úkimetiniń saıtynan alýǵa bolady.

Aıta keteıik, 2021 jylǵy 12 qazanda áleýmettik qorǵaý máseleleri boıynsha qoldanystaǵy zańnamaǵa birqatar ózgerister men tolyqtyrýlar engizilgen bolatyn. Soǵan sáıkes, múgedek balalar birden eki túrli járdemaqy alý quqyǵyn aldy. Bul asyraýshysynan aıyrylǵan jáne múgedek balalary bar otbasylardyń tabys deńgeıin arttyrýǵa múmkindik berip otyr. Buryn qoldanysta bolǵan zańnama normasyna sáıkes, ata-anasynyń bireýi nemese ekeýi (ıaǵnı asyraýshysy) qaıtys bolǵan jaǵdaıda, bala múgedektigi boıynsha nemese asyraýshysynan aırylýyna baılanysty járdemaqynyń bireýin ǵana ala alatyn edi. Endi 2 myńnan astam bala múgedektigine beriletin járdemaqymen (2022 jylǵy mólsheri 50 426-dan 69 155 teńgege deıin) qatar asyraýshysynan aıyrylýy boıynsha tólenetin járdemaqyny da (2022 jylǵy mólsheri 12 667-ten 30 976 teńgege deıin) ala alady.


Uqsas jańalyqtar
Seriktester jańalyqtary

Jańalyqtar