+7 (701) 759 90 19
USD 425.78 EUR 494.08
RUB 5.98 CNY 66.23
Jańalyqtar

Astananyń mıllıonynshy turǵyny bir jasqa toldy

2017 jylǵy 4 shilde 09:00
Bólisińiz:
Astananyń mıllıonynshy turǵyny bir jasqa toldy

ASTANA. QazAqparat - 4 shilde kúni, ıaǵnı búgin elimizdiń bas shaharynyń mıllıonynshy turǵyny Saıda Muhamedııar bir jasqa toldy, dep habarlaıdy «QazAqparat» HAA tilshisi.

«Qyzym 3150 gramm salmaqpen, 52 santımetr boıymen 2016 jyldyń 4 shildesi kúni Astana qalasynyń birinshi perınataldy ortalyǵynda dúnıe esigin ashty. Áý basta eshteńe túsinbeı qaldyq: bizdi basqa palataǵa aýystyrdy da, qala ákiminiń keletinin aıtty, - deıdi anasy Araılym Muhamedııar. - Qolynda 25 raýshan gúli bar Áset Isekeshev bizdiń palataǵa kirip kelip, Saıdanyń Astananyń mıllıonynshy turǵyny ekenin aıtyp, eki bólmeli páterdiń kiltin tabys etti. Al biz jatqan ortalyqtyń ujymy balalardyń tamaqtanýyna arnalǵan ústel men pampers syılady. Ákim ketip qalǵannan keıin de biraz ýaqyt bul oqıǵanyń ras-ótirigine kózimdi jetkize almaı abdyrap qaldym. Bizge páter kilti tabystalǵany týraly aqparat sol sátte-aq BAQ pen áleýmettik jelilerge tarap ketti. Barlyq tanystar men dostarymyz qońyraý shalyp, quttyqtaı bastady. Men tek basymdy ızeı berdim».

Araılym men onyń otbasy qyzdarynyń esimin qoıarda osy jaımen baılanystyrypty. Saıda esimi arab tilinen aýdarǵanda «baqytty» nemese «joly bolǵysh» degen maǵynany bildiredi eken. «Onyń dúnıe esigin ashqanynyń ózi bizge baǵa jetpes baqyt syılaǵan. Buǵan qosa páterge ıe bolǵanymyz, odan ári qýanta tústi. «Kemeni qalaı atasań, solaı júzedi» degen halyqtyń naqylynyń dál kelgeni ǵoı», - deıdi Saıdanyń anasy.

Araılym jańa týǵan nárestelerdiń esebi júrgizilip otyrǵanyn bilmegen de eken. Syıǵa tartylǵan páterge Saıdanyń ómirge kelgenine bes aı tolǵanda kóship kelipti. Jańa páterdiń qujattaryn ázirlep, óz qalaýlarynsha jóndep te alǵan. Baqyttan basy aınalǵan otbasy Áset Isekeshevpen túsken sýretti Internetten taýyp alyp, estelik úshin shyǵaryp alǵan.

Saıdanyń jasy birge endi ǵana tolyp jatsa da, anasy ony «naǵyz ártis» deıdi. Jas bóbek ándi de aıtady, bıdi de bıleıdi.

«Flomasterlermen sýret salýdy óte jaqsy kóredi. Biraq, ustaǵan zatyn aýzyna sala beretindikten, qaýipti-aý degen zattardy ustatpaımyn. Ómirge ákelgennen keıin birden qyzymdy balabaqsha kezegine tirkep qoıdym. Saıda 9 myńynshy kezekte tur. Biraq, ózim de balabaqshada jumys isteıtindikten, bul jaǵynan ýaıymdaı bermeımin», - deıdi Araılym.

Otbasy Pavlodar qalasynan kóship kelgen. Astanada kóship kelgenderine 15 jylǵa jýyqtapty. Jubaıy Oljas Muhamedııar Qostanaı qalasynyń týmasy. Elektromonter bolyp eńbek etedi. Otbasy bes balany dúnıege ákelýdi josparlap otyr.

Bizdiń kanalymyzǵa jazylyńyz:

Bólisińiz:

Avtor:

Aıan Bekenuly

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT