Jańalyqtar  >

Astanalyqtar dárigerlerdiń dóreki sóıleýine jıi shaǵymdanady

2022 jylǵy 1 jeltoqsan, 19:58
Astanalyqtar dárigerlerdiń dóreki sóıleýine jıi shaǵymdanady

ASTANA. QazAqparat – Elorda turǵyndary kóbine emhanalardaǵy medıtsınalyq qyzmet sapasyna, uzyn-sonar kezekke jáne dárigerlerdiń dóreki sóıleýine shaǵymdanady. Búgin bas shaharda BAQ ókilderiniń qatysýymen ótken brıfıngide «Áleýmettik medıtsınalyq saqtandyrý qory» KEAQ Astana qalalyq fılıalynyń dırektory Nurlybek Qabdyqaparov osylaı dedi, dep habarlaıdy QazAqparat tilshisi.

«Medıtsınalyq saqtandyrý qorynyń negizgi basymdyqtarynyń biri – patsıent quqyǵyn qorǵaý. Osyǵan oraı keri baılanys quraldary arqyly túsetin shaǵymdar men ótinishter erekshe baqylaýda bolady. Jyl basynan «Áleýmettik medıtsınalyq saqtandyrý qory» Astana qalasy boıynsha fılıalynyń qyzmetkerleri 6237 ótinish qabyldady. Onyń ishinde 3302 – shaǵym, 417 – alǵys, 206 – shaǵyn jáne orta bıznes úshin saqtandyrý mártebesin túzetý, 2312 – jeńildik sanaty boıynsha ýaqytsha mártebe berý ótinishteri.

Shaǵymdardyń negizgi bóligi «1406» baılanys ortalyǵy men «Qoldau 24/7» mobıldik qosymshasy arqyly túsedi. Túsken barlyq shaǵymdar boıynsha shara qabyldanyp, ótinish ıelerine jaýap berildi. Turǵyndar kóbine emhanalardaǵy medıtsınalyq qyzmet sapasyna, konsýltatıvtik-dıagnostıkalyq qyzmetterdiń qoljetimsizdigine, kezektiń uzaqtyǵyna jáne medıtsına qyzmetkerleriniń dóreki sóıleýine shaǵymdanady» - dedi Nurlybek Qabdyqaparov.

Sonymen birge ol jyl basynan halyqqa kórsetilgen medıtsına qyzmetteriniń sapasyna júrgizilgen monıtorıng nátıjesinde 366 029 kemshilik anyqtalyp, 1 mlrd 737 mln teńge óndirilgenin málim etti.


Uqsas jańalyqtar
Tegı:
Seriktester jańalyqtary

Jańalyqtar