Astanalyq sáýletshi LRT-nyń ornyna tramvaı salýdy usyndy
2022 jylǵy 23 qańtar 14:12

Astanalyq sáýletshi LRT-nyń ornyna tramvaı salýdy usyndy

NUR-SULTAN. QaAqparat – Astanalyq sáýletshi Ámir Ábilov LRT qurylysynyń ornyna tramvaı qoǵamdyq kólik jelisin salýdy usyndy, dep habarlaıdy QazAqparat tilshisi.

Ámir Ábilov jekemenshik kompanııada jumys isteıdi jáne qurylys nysandarynyń jobasyn ázirleýmen aınalysady.

Sala boıynsha tájirıbesiniń azdyǵyna qaramastan sáýletshi elordanyń sol jaǵalaýyndaǵy 5 birdeı nysannyń avtory.

«Elordada metro bolsa degen bala kúngi arnanym bolǵan. Degenmen metro salý ońaıǵa soqpaıtynyn bilip, tramvaı kóligi esime tústi. Tramvaı metro men LRT-ǵa qaraǵanda áldeqaıda arzanǵa túsedi. Tramvaı – ámbebap kólik jáne Eýropa elderi ony qaıta jandandyryp jatyr. Tramvaı kóliginiń damý tarıhy ótken ǵasyrdyń 20 jyldaryna sáıkes keledi. Ekinshi dúnıejúzilik soǵystan keıin tramvaıǵa suranys azaıyp, jeńil avtokólik júıesi damı tústi. Adamdar mashına alyp, joldar da soǵan saı salyna bastady. 90-shy jyldary eýropalyqtar jeńil avtokólik sanynyń kóbeıýine baılanysty, joldardy keńeıtý máseleni sheshpeıtinin túsindi. Osylaısha adamdardy jeńil kólikten bas tartyp, qoǵamdyq kólikke otyrǵyzý ıdeıasy týyndady. Atalǵan ıdeıa bir jaǵynan keptelis problemasyn sheshse, ekinshi jaǵynan qalanyń ekologııasyn jaqsartady», - dedi Á. Ábilov.

Onyń aıtýynsha, elordanyń kósheleri tramvaı kóliginiń jelisine yńǵaıly.

«Men tramvaı jelisiniń jobasyn ázirlep te qoıdym. Ony kezeń boıynsha júzege asyrýǵa bolady. Mysaly, jańa meshitten EKSPO-ǵa deıin, Qabanbaı batyr dańǵylynan Samal shaǵyn aýdanyna deıin jáne Respýblıka dańǵylynan eski vokzal aýdany ıaǵnı Gete kóshesine deıin tramvaıdy iske qosýǵa bolady. Odan ári istiń qalaı júretinin qadaǵalaý arqyly kólik jelisin jetildire túsýge bolady», - deıdi ol.

Sáýletshi óz jobasyn ázirleýde Batys Eýropanyń tramvaı jelisin negizge alǵan.

«2007 jyly Parıjde jańa tramvaı jelisi salyndy. Sondaı-aq, Marsel qalasynda da tramvaı jelisi jaqsy damyǵan. Búginde búkil Eýropada atalǵan kólik qatynasy jelisi qarqyndy damý ústinde», - dedi maman.

Odan bólek, Ámir Ábilov astanalyqtar úshin qandaı nasyndardyń jetispeıtindigin aıtty.

«Menińshe, elordada mektep jetispeıdi. Sebebi turǵyn úı keshenderiniń sany artyp jatyr. Osy oraıda qoǵamdyq oryndardy kóbeıtý qajet. Árıne, qala turǵyny jáne sáýletshi retinde turǵyndar men qala qonaqtary úshin yńǵaıly ınfraqurylymnyń bolǵanyn qalaımyn», - deıdi astanalyq sáýletshi.

Eske sala ketsek, Memleket basshysy Qasym-Jomart Toqaev LRT qurylysyn synǵa alyp, ol boıynsha ońtaıly sheshim qabyldaý qajettigin aıtqan edi.


Jańalyqtar

MURAǴAT