Astanadaǵy kásipqoı boks keshi: Taǵy 2 qazaqstandyqtyń qarsylastary anyqtaldy
2021 jylǵy 28 qarasha 19:06

Astanadaǵy kásipqoı boks keshi: Taǵy 2 qazaqstandyqtyń qarsylastary anyqtaldy

NUR-SULTAN. QazAqparat – 18 jeltoqsan kúni Nur-Sultan qalasynda ótetin kásipqoı boks keshinde óner kórsetetin taǵy 2 qazaqstandyq boksshynyń qarsylastary belgili boldy, dep habarlaıdy QazAqparat VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap.

Birinshi jartylaı orta salmaqtaǵy qazaqstandyq boksshy Aıdar Sháribaev (8-1, 7KO) Reseı atynan rıngke shyǵyp júrgen Qyrǵyzstan týmasy Shohrýh Abdıevpen (9-2-1, 3KO) qolǵap túıistiredi. Jekpe-jek formaty - 6 raýnd.⠀
Sháribaev úshin bul bıylǵy jyldaǵy alǵashqy aıqas bolady. Buǵan deıin ol 2020 jyldyń 18 jeltoqsanynda ózbek Shovkat Halılovty birinshi raýndta tehnıkalyq nokaýtpen jeńgen edi.

Birinshi jartylaı orta salmaqtaǵy Dáýlet Dáýkenov (9-2, 4KO) bolsa, Gana ókili Anama Dotsemen (18-4, 17KO) kezdesedi. Jekpe-jek 6 raýndqa eseptelgen.

Dáýkenov bunyń aldyndaǵy aıqasyn bıylǵy 13 qarashada Nur-Sultan qalasynda ótkizdi. Ol ózbek Rasýl Týlebaevty (0-1) birinshi raýndta tehnıkalyq nokaýtpen jeńdi.

18 jeltoqsan kúni elordada QR Táýelsizdiginiń 30 jyldyǵyna arnalǵan kásipqoı boks keshi ótetinin buǵan deıin jazǵan bolatynbyz. Keshtiń basty aıqastary: jartylaı orta salmaqtaǵy Danııar Eleýsinov (10-0, 6 KO) pen «Esi ketken» laqap atymen tanymal meksıkalyq boksshy Dante Hardon (34-7, 25 KO), sondaı-aq aýyr salmaqtaǵy boksshymyz Ivan Dychko (10-0, 10 KO) men 44 jastaǵy reseılik Aleksandr Ýstınov (36-5-1, 27 KO) arasynda ótedi.

Olımpıada chempıony D.Eleýsinov birden eki tıtýl: IBF Inter-Continental nusqasy boıynsha álem chempıony jáne IBO tıtýly úshin qolǵap túıistiredi.

Bul kúni rıngke sondaı-aq, Danııar Eleýsinovtiń inisi Dáýren Eleýsinov (8-1-1, 7 KO) shyǵady.

Profıboks keshi «Habar» telearnasynan kórsetiledi.




Avtor:
Tilshi

Jańalyqtar

MURAǴAT