Astanada voleıboldan  ardager sportshylar arasynda halyqaralyq týrnır ótti
2022 jylǵy 27 maýsym 01:14

Astanada voleıboldan  ardager sportshylar arasynda halyqaralyq týrnır ótti

NUR-SULTAN. QazAqparat – Elordadaǵy «Astana» sport kesheninde voleıboldan ardager sportshylar arasynda halyqaralyq týrnır ótti, dep habarlaıdy QazAqparat.

Týrnır Qazaqstannyń eńbek sińirgen sport qaıratkeri Ersultan Bekturǵanovtyń 70 jyldyq mereıtoıyna arnaldy.

Memlekettik qyzmettiń ardageri, QR Parlamenti Májilisiniń V-VI shaqyrylymdarynyń depýtaty Ersultan Bekturǵanov elimizde buqaralyq sportty damytýǵa úles qosyp keledi. Bıyl ózi qurǵan «Saryarqa» voleıbol klýbynyń 25 jyldyǵy. Onyń negizi 1997 jyly elordaǵa qonys aýdarǵan memlekettik qyzmetshilerden quralǵan edi.

Jarysqa Nur-Sultan qalasynan bólek, Almaty, Aqmola, Túrkistan óńirleriniń jáne Ózbekstan Respýblıkasynyń komandalary qatysty. Sonymen qatar jańadan qurylǵan Abaı, Ulytaý, Jetisý oblystary da óz komandalaryn jasaqtap jarysqa jiberdi.

Eki kúnge sozylǵan jarys qorytyndysynda 8 komandanyń ishinen fınalǵa Almaty oblysy men «Saryarqa» voleıbol klýby shyqty. Bes partııaǵa sozylyp, óte tartysty ótken básekede Almaty komandasy jeńiske jetip, arnaıy kýbokqa ıe boldy. Al úshinshi orynnyń júldesi – Túrkistan oblysynyń sportshylarynyń enshisinde. Jaqsy óner kórsetken birneshe sportshy «úzdik qorǵaýshy», «úzdik tosqaýylshy», «úzdik shabýylshy» atandy. Olarǵa syılyqtar tabys etildi.

«Ersultan Óteǵululynyń 70 jasqa tolǵan mereıtoıyna komanda alyp kelip turmyn. Ekeýmiz birinshi synypqa birge barǵanbyz. Sodan beri dospyz. Bizdiń áke-sheshelerimiz ózara dos boldy. Sol dostyqty bizder jalǵastyrýdamyz. Biraz jasqa kelsek te, sportty serik etip kelemiz. Osyndaı jarystar jastarǵa úlgi bolady»,- dedi memleket qaıratkeri Amandyq Batalov QazAqparat tilshisine.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT