Jańalyqtar  >
  Astana

Astanada Rojdestvonyń qaıyrymdylyq jármeńkesi ótip jatyr

2022 jylǵy 4 jeltoqsan, 13:34
Astanada Rojdestvonyń qaıyrymdylyq jármeńkesi ótip jatyr

ASTANA. QazAqparat – Astanada jyl saıyn Rojdestvo qarsańynda uıymdastyrylatyn dástúrli qaıyrymdylyq jármeńkesi ótip jatyr, dep habarlaıdy QazAqparat tilshisi.

Dıplomattar jubaılarynyń qaýymdystyǵy (ASA) uıymdastyratyn sharaǵa qatysý úshin astanalyqtar kún arqan boıy kóterilgen sátten bastap Radisson qonaqúıine qaraı aǵyldy. Qonaqúı ishindegi aýra Jańa jyl merekesi merziminen erte kelip qoıǵandaı áser qaldyrady. Nemeresin jetektegen áje de, bala-shaǵasymen ýlap-shýlap júrgen jas otbasylar da osynda. 41 memlekettiń elshiligi jármeńkege arnaıy ákelgen qolóner buıymdary men ulttyq taǵamdardy jeńil baǵamen satyp jatyr. Al satyp alýshylar esep aıyrysqan túbirtek nómiri arqyly lotoreıaǵa qatysýda.


Jármeńkege kelgen halyqqa jón siltep, jol kórsetý úshin Nazarbaev Ýnıversıteti men M. Nárikbaev atyndaǵy KAZGıÝÝ Ýnıversıtetiniń shet tilderin jetik biletin stýdentteri erikti retinde tartylǵan.


Uıymdastyrýshylardyń aıtýynsha, qaıyrymdylyq sharaǵa 22 mektep pen kommertsııalyq emes uıym, 25 qaıyrymdylyq uıym atsalysýda.

«Biz bul jármeńkege Iran Elshiliginiń atynan qatysyp otyrmyz. Munda qoıylǵan zattardyń bári Irannan arnaıy ákelingen. Iran halqynyń qolóner buıymdary men ulttyq taǵamdary, áıgili ıran pistesi men shafrany qoıylǵan. Óte tıimdi baǵamen satylyp jatyr. Bul jármeńkege bizdiń Elshilik jyl saıyn qatysady», - deıdi ırandyq Mahbýbe Chıtsaz.

Álem-jálem jármeńkeniń arasynan qazaqtyń oıýmen tystalǵan qolóner buıymdaryn kózimiz shalyp qaldy. Sóıtsek, Jambyl oblysy Taraz qalasyndaǵy «Sheber shańyraq» múgedekter qoǵamdyq birlestigi osy sharaǵa birinshi ret óz buıymdaryn ákelgen eken.


«Qoǵamdyq birlestigimiz qurylǵanyna 1 jyl ǵana boldy. Munda kóp balaly analar, múgedektigi bar analar, erekshe balasy bar analar birlesken. Bárimiz sonda qolónermen, shaǵyn bızneske jol ashatyn basqa da kásip túrlerimen aınalysamyz. Ózim dúnıege eki qolsyz kelgenmin, aıaǵymmen is tigemin. Jeke kásipker retinde tirkelip, iskerlikti qolǵa alǵanyma 9 jyl boldy. Endi sol júrip ótken jolymdy ózge taǵdyrlastaryma úıretip júrmin. Jármekege qoıǵan zattarymyzǵa sheteldikter qatty qyzyǵyp jatyr. Sizderdiń aldaryńyzda ǵana Anglııadan kelgen tilshi bir jastyq pen qoldan tigilgen qýyrshaǵymyzdy satyp áketti», - deıdi qoǵamdyq birlestiktiń tóraıymy Anar Beksultan.


Uıymdastyrýshylar jármeńkeden túsken qarajat ádettegideı qaıyrymdylyq sharalarǵa baǵyttalatynyn aıtady.

Jármeńke aıasyndaǵy lotoreıa utysynyń negizgi júldesine LADA X-RAY tigilipti. Sondaı-aq, 9 baǵyt boıynsha áýe bıletteri men iri turmystyq tehnıka, oıyn-saýyq sharalaryna joldamalar utysqa qoıylǵan.

Jármeńke bir kúnge ǵana josparlanǵan.




Tegı:
Seriktester jańalyqtary

Jańalyqtar