Jańalyqtar  >
  Din
Astanada Ortalyq Azııadaǵy eń úlken meshit ashyldy
2022 jylǵy 12 tamyz 11:58

Astanada Ortalyq Azııadaǵy eń úlken meshit ashyldy

NUR-SULTAN. QazAqparat – Elordada Ortalyq Azııadaǵy eń úlken meshit ashyldy. Ashylý rásimine Elbasy Nursultan Nazarbaev arnaıy qatysty, dep habarlaıdy QazAqparat tilshisi.

«Búgin elimizdiń rýhanı ómirinde eleýi kún, tarıhı sát. Qazaq topyraǵynda buryn-sońdy bolmaǵan, arǵy bergi tarıhymyzda kezdespeıtin, Qazaqstan Respýblıkasynyń Tuńǵysh Prezıdenti Nursultan Nazarbaevtyń bastamasymen salynǵan sáýleti men sáni jarasqan záýlim meshittiń ashylý rásimine qosh keldińizder. Alla taǵala meshitke basyp kelgen qadamdaryńyzǵa saýaptan bergeı!» - dedi QMDB Tóraǵasynyń orynbasary Ershat Ońǵar.

Jańa meshit Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń bastamasymen úsh jyldyń ishinde salyndy. Meshit ornalasqan jer ýchaskesiniń alańy – 10 gektar. Onyń jalpy alańy – 68 062 sharshy metr. Úlken kúmbezdiń bıiktigi – 83,2 metr, dıametri – 62 metr. Meshittiń tórt munarasy bar. Onyń bıikti – 130 metr.

Sonymen qatar, meshittiń jerasty qabatynda 440 oryndyq banket zaly, 405 oryndyq jabyq parkıng, vestıbıýl, dárethana, tehnıkalyq, rıtýaldyq qyzmet kórsetý orny, qurban shalý orny jáne basqa bólmeler ornalasqan.

Birinshi jáne ekinshi qabattarda namaz oqıtyn orynnan bólek synyptar, konferents-zal, neke qııý zaly, Quran oqıtyn bólme, telestýdııa, keńseler, qyzmettik bólmeler, dúkender, murajaı jáne tehnıkalyq bólmeler bar.

Meshittiń jalpy syıymdylyǵy 235 000 adamdy quraıdy, ıaǵnı bir mezette osynsha adam sapta turyp namaz oqýǵa múmindigi bar. Ashyq alańda shamamen 200 myń adam, ıaǵnı: podıým men sahna aımaǵynda 30 myń adam, meshit aýlasynda 170 myń adam bir mezette qulshylyq jasaýǵa múmkindik bar. Meshit ishinde 35 myń adam, ıaǵnı: erlerge arnalǵan orynda 30 myń adam; áıelderge arnalǵan orynda 5 myń adam namaz oqı alady.

Meshittiń syıymdylyǵy boıynsha Nur-Sultan qalasyndaǵy respýblıkalyq Bas meshit álemdegi eń úlken 10 meshittiń qataryna endi.


Seriktester jańalyqtary

Jańalyqtar

Úrdis

MURAǴAT