Astanada LRT qurylysy jalǵasady – Altaı Kólginov
2022 jylǵy 29 maýsym 16:34

Astanada LRT qurylysy jalǵasady – Altaı Kólginov

NUR-SULTAN. QazAqparat – LRT qurylysy jalǵasady. Bul týraly Baigenews tikeleı efırinde Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.

«Ýrbanıstıka ortalyǵy qoǵam men transport salasyndaǵy mamandardan usynys jınaǵanyn bilesizder. Osynyń negizinde halyqaralyq mamandar men el azamattarynan 400-den astam usynys tústi. Qoryta aıtqanda, azamattardyń 51 paıyzdan astamy jobanyń jalǵasqanyn qalaıdy. 42 paıyzy jobanyń ózge alternatıvada jasalǵanyn, salynǵanyn qoldaıdy. Al usynys bildirgenderdiń 7 paıyzy qurylysty tolyq súrip tastaý qajet ekenin aıtqan. Biz birneshe nusqany qarastyrdyq. Onyń ishinde osy nysandardy buzyp, ornyn tazartý ıdeıasy da boldy. Biraq qalada 500-den astam baǵana bar. Ony tolyq súrip tastaý úshin shamamen 20 mlrd teńge qajet. Sondyqtan bıýdjetten kóp qarjy jumsalǵanyn eskere kele, LRT qurylysyn tolyq aıaqtaý oıǵa qonymdy dep sheshtik. Degenmen únemdeýge týra keledi. Bastapqyda jobaǵa 1 mlrd dollardan astam aqsha qajet bolatyn. Al biz shyǵyndardy qysqartý arqyly qurylysty aıaqtaýǵa 577 mln dollar qajet dep otyrmyz», - dedi elorda ákimi.

Altaı Kólginov bastapqyda josparlanǵandaı 18 stantsııa emes, 8 stantsııany iske qosylatynyn málimdedi.

Ol áýejaıdan bastap Qabanbaı batyr dańǵylyna deıingi aralyqty qamtıdy.

Ákimniń sózinshe, 5 jyljymaly quram jumys isteıdi. Ár quramǵa jalpy sany 600 adam syıatyn 4 vagon jalǵanady.

«Transporttyń júrý jıiligi 15 mınýt bolady dep josparlanyp otyr» dep atap ótti Altaı Kólginov.


Jańalyqtar

Úrdis

MURAǴAT