Astanada LRT qurylysy kelesi jyldyń sońyna deıin aıaqtalady - Jeńis Qasymbek
ASTANA. QazAqparat - LRT jobasy kelesi jyly aıaqtalady. Bul týraly Habar 24 arnasyndaǵy «President» baǵdarlamasynda elorda ákimi Jeńis Qasymbek aıtty, dep habarlaıdy QazAqparat.
Jeńis Qasymbektiń sózinshe, jerústi metropolıteniniń qurylysyn aıaqtaý jumysy ótken jyly bastalǵan.
Endi qalǵan barlyq sharýa keler jyldyń sońynda aıaqtalady.
«Ótken jyly Úkimet alǵashqy qarjyny berdi. Bıyl bul nysan qurylysy belsendi júredi. Qazir jumysty pysyqtap, tehnıka boıynsha, osy LRT-da jumys isteıtin poıyzdar boıynsha avanstyq tólemder júrip jatyr. Joba 2023-2024 jyl ishinde júzege asyrylyp, kelesi jyldyń sońyna deıin iske qosylýy tıis dep josparlanǵan», - dedi shahar basshysy Jeńis Qasymbek.
Eske sala keteıik, qańtardaǵy Memleket basshysy Qasym-Jomart Toqaevtyń tóraǵalyǵymen elordany damytý máseleleri jónindegi keńeste LRT jobasy sóz boldy.
Prezıdenttiń aıtýynsha, LRT jobasy qate boldy, biraq ony toqtatsaq, shyǵyn odan da kóp bolady.
Aıta keteıik, elordadaǵy LRT qurylysy 2019 jyly sáýirde toqtatylǵan edi.
2020 jyldyń qańtarynda LRT-ǵa qatysty isti tergeý sharalary aıaqtaldy. Sol jyly qazanda is sot qaraýyna joldandy.
Sondaı-aq, byltyr 13 tamyzda astana prokýratýrasy elorda ákiminiń burynǵy orynbasary Qanat Sultanbekov pen «Astana LRT» JShS basqarma tóraǵasy Talǵat Ardanǵa qatysty qylmystyq istiń sotqa joldanǵanyn habarlady.
Biraq, atalǵan eki kúdikti qazirgi ýaqytta qylmystyq qýdalaýdan boı tasalap júr.
Jańalyqtar
