Jańalyqtar  >
  Astana

Astanada eki aılyq sábıdiń basyna kúrdeli ota jasaldy

2022 jylǵy 28 qarasha, 12:06
Astanada eki aılyq sábıdiń basyna kúrdeli ota jasaldy

ASTANA. QazAqparat - Elordada Ulttyq neırohırýrgııa ortalyǵynyń dárigerleri eki aılyq sábıdiń mı isigin joıý úshin kúrdeli operatsııa jasady. Qazirgi ýaqytta bala operatsııadan keıingi emdelýde, anasymen birge palatada jatyr, dep habarlaıdy

Balanyń ata-anasy aýrýdyń alǵashqy belgilerin náresteniń qatty mazasyzdyǵy men álsizdigenen keıin baıqady. Sonymen qatar, náresteniń basynyń kólemi ulǵaıyp, eńbeginiń isinýi baıqaldy. Balanyń anasy nevropatologqa júgindi. Ári qaraı dáriger neırosonografııaǵa jáne bas mıynyń KT-syna jiberdi, onda gıdrotsefalııa belgileri anyqtaldy.

Sábıge alǵashqy operatsııa Almaty qalasynyń №2 qalalyq balalar aýrýhanasynda júrgizildi. Dárigerlerdiń keńesimen ekinshi ota Ulttyq neırohırýrgııa ortalyǵynda josparlanǵan.

Balalar neırohırýrgııasy bóliminiń meńgerýshisi Ǵabıt Іlııasuly Ólenbaı atap ótkendeı, operatsııanyń kúrdeliligi isik osy jastaǵy bala úshin jetkilikti úlken (4*3 sm) fýnktsıonaldy mańyzdy aımaqta ornalasýynda boldy. Sonymen qatar, ólimge deıin aýyr asqynýlarǵa ákeletin operatsııalyq qan joǵaltý qaýpi joǵary boldy. Іsik týa bitken jáne bala qursaǵynda paıda bolǵan, bul ózdiginen sırek kezdesetin qubylys bolyp sanalady.

«Biz mıkrohırýrgııalyq aralasý jasadyq, oń jaq qarynshanyń artqy múıiziniń qarynshaishilik isigin alyp tastadyq, onda barlyq zamanaýı ádister qoldanyldy. Sondaı-aq, qyzmetkerlerdiń joǵary biliktiligi jáne bizdiń ortalyqtyń operatsııalyq blogynyń jabdyqtalýy operatsııanyń sáttiliginde mańyzdy ról atqardy. Neırohırýrgııalyq navıgatsııalyq júıeniń baqylaýymen biz isikke dáldikpen jetip, ony tolyǵymen alyp tastadyq. Qazirgi ýaqytta sábı operatsııadan keıingi emdelýde, anasymen birge palatada jatyr. Aıta keteri, operatsııa MÁMS aıasynda kvotalyq negizde ótti», - dedi neırohırýrg dáriger Ǵabıt Ólenbaı.

Sonymen qatar, anestezıologtardyń joǵary kásibıligin atap ótken jón. Osyndaı kishkentaı patsıentterge operatsııalar árqashan anestezııany qoldanýda úlken qıyndyqtarmen birge júredi. Qan, tynys alýdy muqııat baqylaý, anestezııany óte muqııat esepteý, balanyń ómiri úshin úlken jaýapkershilik – munyń bári neırohırýrgııa ortalyǵynyń kópsalaly ujymynyń moınyna júkteldi.

Operatsııany joǵary sanatty bilikti neırohırýrg, balalar neırohırýrgııasy kafedrasynyń meńgerýshisi, «UNO» AQ professory Ǵabıt Іlııasuly Ólenbaı, sondaı-aq neırohırýrg dáriger Saparbek Bazarbaıuly Seıtbekov júrgizdi. Sondaı-aq operatsııany anestezıolog-reanımatolog dáriger Aıgúl Qaıyrqyzy Jandeldınova, transfýzıolog dáriger Erbol Naǵashpaıuly Qýanyshev jáne operatsııalyq medbıke Madına Rahmatýllaqyzy súıemeldedi.


Uqsas jańalyqtar
Tegı:
Seriktester jańalyqtary

Jańalyqtar