Astanada baitursynuly.kz saıtynyń tanystyrylymy ótti
ASTANA. QazAqparat - Astana qalasynda baitursynuly.kz saıtynyń tanystyrylymy ótti, dep habarlaıdy QazAqparat Ǵylym jáne joǵary bilim mınıstrligine silteme jasap.
Saıtty QR ǴJBM Til saıasaty komıteti Sh.Shaıahmetov atyndaǵy «Til-Qazyna» ulttyq-ǵylymı praktıkalyq ortalyǵy jasap shyǵardy. Onda ult ustazy Ahmet Baıtursynulynyń ómirbaıanynan bólek, kóptegen aıdarlar boıynsha mol málimet alýǵa bolady. Olardyń arasynda – «Álipbı jáne emle», «Oqýlyqtar», «Maqalalar», «Hattar», «Óleńder», «Aýdarmalar», «Qanatty sózder», «Qujattar», «Ahmettaný» syndy rýbrıkalar bar.
Sondaı-aq búgin ótken is-shara barysynda A.Baıtursynulynyń qazaq, aǵylshyn, túrik jáne orys tilderinde tuńǵysh ret jaryq kórgen tańdamaly shyǵarmalarynyń, ǵylymı ekspedıtsııanyń «Alash qozǵalysy: derek pen dáıek» atty qorytyndy jınaǵy tanystyryldy.
«Ahmet Baıtursynuly «Qazaq» gazetiniń bastaýynda turǵan tulǵa retinde otandyq baspasózdiń odan keıingi damýyna keń óris ashyp berdi. Ult ustazynyń ónegeli ómir joly – Otanǵa adal da qaltqysyz qyzmet jasaýdyń óshpes úlgisi. Alash arysynyń esimin máńgi este saqtap, onyń jasampaz isin jalǵastyrý – bizdiń boryshymyz», - dedi Sh.Shaıahmetov atyndaǵy «Til-Qazyna» ulttyq-ǵylymı praktıkalyq ortalyǵynyń bas dırektory Erbol Tileshov.
Kópshilik kózaıymyna aınalǵan jaýhar jádigerlerdiń tusaýkeser rásimine kórnekti memleket jáne qoǵam qaıratkerleri, otandyq jáne sheteldik ǵylymı uıymdar men zııaly qaýym ókilderi qatysty.
Foto: www.facebook.com/gylym.jogarybilim
