Astanada 8-qabattaǵy terezeden balany qutqaryp qalǵan Sábıt Shontaqbaev marapattaldy
2022 jylǵy 11 mamyr 17:05

Astanada 8-qabattaǵy terezeden balany qutqaryp qalǵan Sábıt Shontaqbaev marapattaldy

NUR-SULTAN. QazAqparat - Astanada 8-qabattaǵy terezeden salbyrap turǵan balany qutqaryp qalǵan Sábıt Shontaqbaev «Tótenshe jaǵdaıdaǵy erligi úshin» tósbelgisimen marapattaldy. Bul týraly QazAqparat Tótenshe jaǵdaılar mınıstrliginiń baspasóz qyzmetine silteme jasap habarlaıdy.

«TJ birinshi vıtse-mınıstri general-leıtenant Kúlshimbaev Ibragım batyr azamat Shontaqbaev Sábıtti «Tótenshe jaǵdaıdaǵy erligi úshin» tósbelgisimen marapattady. Ol elordada balany terezeden qulaýdan qutqardy» delingen habarlamada.

Málimetke saı, 11 mamyr kúni saǵat 10:21-de «Uly Dala kóshesi, 27/1» mekenjaıyndaǵy úıdiń 8-qabatyndaǵy terezede balanyń ilinip turǵany týraly habarlama kelip túsken. Shaqyrtý ornyna jeke quramnan 7 adam jáne 2 birlik tehnıkadan turatyn Nur-Sultan qalasynyń TJD bólimsheleri jedel jiberilgen.

Qutqarýshylar oqıǵa ornyna kelgen kezde segizinshi qabattaǵy balkonnyń karnızine ilingen balany er adam qutqarǵany anyqtaldy.

«2019 jyly týǵan qyz bala terezeden aýyp ketken kezde úıde eshkim bolmaǵan. Qýantarlyǵy, bizdiń keıipkerimiz — 1985 jyly týǵan Sábıt Shontaqbaev, ony qutqaryp qaldy.

Qurmetti ata-analar, bul bala aman-esen qutqarylǵan sátti oqıǵa, biraq qaıǵyly nátıje beretin kóptegen faktiler bar.

Balalardy qaraýsyz qaldyrmańyzdar! Eger úıde kishkentaı bala bolsa, terezeni ashyq qaldyrmańyzdar!» dep túıindelgen TJM habarlamasy.
Aıta keteıik, buǵan deıin elordada 8 qabattaǵy terezeden salbyrap turǵan búldirshindi er adamnyń qutqaryp qalǵanyn jazǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT