«Astana Sý Arnasy» jumysshylarynyń ólimine qatysty tergeý júrgizilýde

NUR-SULTAN. QazAqparat - Elordanyń Polıtsııa departamentiniń ókilderi «Astana Sý Arnasy» mekemesiniń tórt qyzmetkeriniń ólimine qatysty pikir bildirdi, dep habarlaıdy QazAqparat tilshisi.

«23 mamyr kúni saǵat 16.24 kezinde Baýyrjan Momyshuly dańǵylyndaǵy «Kárizdik-sorǵylyq stansaıa» aýmaǵynda jumys júrgizý barysynda 4 qyzmetker bıogazben ýlanyp qalǵan. Atalmysh fakt boıynsha, QR Qylmystyq kodeksiniń 156-baby (Eńbekti qorǵaý qaǵıdalaryn buzý) boıynsha sotqa deıingi tergeý amaldary bastaldy. Qajetti saraptama jumystary taǵaıyndalyp, sonyń nátıjesi boıynsha protsessýaldyq sheshim qabyldanatyn bolady», - dep habarlaıdy Polıtsııa departamentinen.

Eske sala ketsek, Nur-Sultan qalasynda 4 adamnyń metan gazynan ýlanyp kóz jumǵany týraly keshe habarlanǵan bolatyn. Oqıǵa astanadaǵy Oqýshylar saraıynyń mańyndaǵy qudyqtardyń birinde bolǵan. Ýlanǵandardyń barlyǵy kóz jumǵan.

Qala ákimi Baqyt Sultanovtyń aıtýynsha, tórteýi de - «Astana sý arnasy» kommýnaldyq mekemesiniń qyzmetkerleri.

«Ózimniń jáne ákimdiktiń atynan marqumdardyń otbasyna qaıǵyryp kóńil aıtamyn. Ákimdik barlyq qajetti kómekti kórsetedi. Tıisti qyzmetterge egjeı-tegjeıli tergeý júrgizip, qaıǵyly oqıǵanyń sebepterin anyqtaýdy tapsyrdym», - dep jazdy qala basshysy Facebook-tegi paraqshasynda.