+7 (701) 759 90 19
USD 412.55 EUR 468.66
RUB 5.79 CNY 58.80
Jańalyqtar

«Astana Opera» teatry jetinshi maýsymdy qorytyndylady

2020 jylǵy 7 shilde 14:53
Bólisińiz:
«Astana Opera» teatry jetinshi maýsymdy qorytyndylady

NUR-SULTAN. QazAqparat - «Astana Opera» teatry jetinshi maýsymnyń qorytyndysyn shyǵardy, dep habarlaıdy QazAqparat.

«2019/2020 jylǵy jetinshi teatr maýsymy jarqyn ári este qalarlyq bolǵandyǵy sózsiz. Sensatsııaǵa toly premeralar, ártisterimizdiń halyqaralyq jobalarǵa qatysýy, ujymnyń sátti gastrolderi – osynyń barlyǵy «Astana Operanyń» eń joǵary deńgeıdegi teatr retindegi pozıtsııasyn odan ári nyǵaıta tústi. Koronavırýs maýsymnyń naǵyz qyzǵan sátin sý sepkendeı basty. Kórermender birqatar ǵalamat premeralardy tamashalap úlgermedi. G.Donıtsettıdiń «Don Paskýale», «Mahabbat sýsyny» operalary, T.Qajyǵalıevtiń mýzykasyna «Dala úni» baletiniń ótetin kúnderi aýystyryldy, sóıtip, olar jańa segizinshi maýsymda ónersúıer qaýymǵa jol tartpaq», - dedi teatrdan.

«Astana Operanyń» jankúıerleri úshin shyǵarmashylyq ujym 185 is-shara, onyń ishinde balalarǵa arnalǵan 20 shara ótkizgen. Karantın kezinde 15 onlaın-joba júzege asyrylyp, TENGRI TV-den 41 spektakl kórsetildi.

Qoıylymdardyń jańa qory

Jetinshi maýsymnyń sońyna teatr mańyzdy jetistiktermen jetti. Asqaq ónerdi baǵalaýshylar úshin ujym QR Mádenıet jáne sport mınıstrliginiń qoldaýymen 3 premera usyndy:

Dj.Verdıdiń «Don Karlos» operasy (11,13 qazan). Osy spektakldiń jetistikke jetýine «basty keıipker» – qoıýshy dırıjer, ataqty maestro, Qazaqstannyń eńbek sińirgen qaıratkeri, QR Memlekettik syılyǵynyń laýreaty Alan Bóribaevtyń eńbegi erekshe. Jetekshi solıster, hor, mımans ártisteri joǵary kásibı sheberlikteri men minsiz oryndaýshylyq ónerin pash etti.

L.Delıbtiń «Koppelııa» baleti (22,23 qarasha). Teatrdyń jetekshi solısteri bul baletti naǵyz frantsýzdyq ázilde oryndady. Horeograf – Rolan Petı, qoıýshy baletmeıster – Lýıdjı Bonıno, qoıýshy dırıjer – Arman Orazǵalıev, balet trýppasynyń kórkemdik jetekshisi – Reseıdiń Halyq ártisi Altynaı Asylmuratova.

L.Bethoven, I.S.Bah, V.A.Motsart, I.Gaıdn, D.Haýbrıhtiń mýzykasyna «Bethoven – Máńgilik – Mahabbat» baleti (14,15 aqpan). Osynaý álemdik premerany sensatsııalyq dep nyq senimmen aıtýǵa bolady. «Astana Opera» atalmysh baletti mýzyka kemeńgeri Lıýdvıg van Bethovenniń 250 jyldyǵyna arnady. Qoıýshy baletmeıster – tanymal nemis horeografy Raımondo Rebek. «Astana Opera» balet trýppasynyń kórkemdik jetekshisi – Altynaı Asylmuratova, qoıýshy dırıjer – Abzal Muhıtdın, bas hormeıster – Erjan Dáýitov.

Álem teatrlarymen baılanysta

«Rýhanı jańǵyrý» baǵdarlamasy aıasynda «Astana Opera» ujymy kelesi gastroldik saparlarǵa shyqty: ótken jyldyń 20 qazanynda ujym «Sankt-Peterbýrg Opera» shaqyrtýy boıynsha IV halyqaralyq kameralyq opera festıvali aıasynda «Sankt-Peterbýrg Opera» Kameralyq teatrynda (Sankt-Peterbor q., Reseı) Dj.Rossınıdiń «Jibek saty» opera-farsyn usyndy. Shaqyrýshy taraptyń «Astana Opera» teatrynyń gastroline baılanysty barlyq shyǵyndardy óz moınyna alǵandyǵyn atap ótken jón.

Sol aıda qazaqstandyq teatr ataqty ánshi Dmıtrıı Hvorostovskııdiń mádenı murasyn saqtaý men qoldaýǵa baǵyttalǵan birinshi festıvalge qatysty. Qazannyń 23 jáne 25 kúnderi D.A.Hvorostovskıı atyndaǵy Krasnoıarsk memlekettik opera jáne balet teatrynda qazaqstandyq ártister P.I.Chaıkovskııdiń 180 jyldyǵyna oraı onyń «Evgenıı Onegın» operalyq jaýharynyń ǵalamat qoıylymyn sahnalady, al 24 qazan kúni Krasnoıarsk fılarmonııasynyń Úlken kontsert zalynda kórermen qaýym nazaryna qazaqstandyq kompozıtorlardyń týyndylarynan quralǵan sımfonııalyq baǵdarlamany usynyp, L.Bethovenniń 250 jyldyǵyna oraı Orkestr men fortepıanoǵa arnalǵan №5 kontsert, mı-bemol major, or. 73 oryndady.

2020 jylǵy 16 aqpanda opera trýppasynyń solısteri Qaraǵandy tyńdarmandaryna ataqty kompozıtor Dj.Rossınıdiń «Jibek saty» operasyn usyndy. Ártister S.Seıfýllın atyndaǵy Qaraǵandy oblystyq qazaq drama teatrynyń sahnasynda óner kórsetti.

Jaýapty gastrolder

Eski baılanystardy qalypqa keltirip, jańalaryn jolǵa qoıa otyryp, «Astana Opera» reseılik úsh teatr ujymyn qabyl aldy. 9-10 qarasha kúnderi «Sankt-Peterbýrg Opera» memlekettik kameralyq teatry Dj.Verdıdiń «Rıgoletto» jáne J.Bızeniń «Іnjý izdeýshiler» operalaryn usyndy. Peterborlyq shyǵarmashylyq ujym ózderiniń kórkemdik jetekshisi – Reseıdiń Halyq ártisi, QR Memlekettik syılyǵynyń laýreaty, «Dostyq» ordeniniń kavaleri, elordadaǵy opera óneriniń negizin qalaýshylardyń biri ıÝ.I.Aleksandrovpen birge Nur-Sultanǵa at basyn tiredi. Tanymal rejısser K.Baıseıitova atyndaǵy teatr trýppasymen kóp jyldar boıy jumys jasap, 13 opera spektakliniń qoıylymyn júzege asyrdy.

D.A.Hvorostovskıı atyndaǵy Krasnoıarsk memlekettik opera jáne balet teatrynyń gastroli aıasynda 29 qarashada A.Borodınniń «Knıaz Igor» operasy, 1 jeltoqsanda – ataqty horeograf ıÝ.Grıgorovıchtiń qoıylymyndaǵy A.Glazýnovtyń «Raımonda» baleti sahnalandy.

2020 jyly «Astana Opera» sahnasynda Evgenıı Vahtangov atyndaǵy Memlekettik akademııalyq teatrdyń alǵashqy gastroli oryn alǵanyn atap ótken mańyzdy. Reseıdiń eń tanymal drama teatrlary biriniń juldyzdy ártisteri elorda turǵyndary men qonaqtaryna 8 jáne 9 qańtar – A.S.Pýshkınniń «Evgenıı Onegın» romanynan kórinister, 10 jáne 11 qańtar – A.P.Chehovtyń «Dıadıa Vanıa» tanymal spektaklderin usyndy.

Sheteldik teatr afıshalaryndaǵy «Astana Opera» ártisteriniń esimderi

Kóptegen ártister halyqaralyq jobalarǵa qatysa otyryp, maýsym boıy «Astana Opera» teatrynyń bedelin asqaqtatty. Olardyń qatarynda Alan Bóribaev (Fınlıandııa, Qytaı, Belgııa, Germanııa, Chehııa), Baqtııar Adamjan (Italııa, Koreıa, Reseı), Serik Nakyspekov (Ýkraına), Áıgerim Beketaeva (Belarýs, Reseı), Taıyr Ǵataýov, Gaýhar Ýsına (Qyrǵyzstan), Saltanat Ahmetova (Reseı), Aızada Qaponova (Qytaı, Reseı), Aıgúl Nııazova, Amına Taıkenova ın der Shmıtten (Túrkııa), Jupar Ǵabdýllına (Reseı, Bosnııa jáne Gertsegovına), Talǵat Musabaev (Reseı), Abzal Muhıtdın (Italııa, Reseı), Baǵdat Ábilhanov (Reseı) jáne t.b. bar.

Budan bólek, solıster «Astana Opera» sahnasynda belsendi jumys atqardy, olardyń kóbisi aǵymdyq repertýardaǵy spektaklderde debıýt jasady.

Ataýly kúnder

Opera sahnasynyń ańyzy, Sotsıalıstik Eńbek Eri, KSRO Halyq ártisi, KSRO Memlekettik syılyǵynyń laýreaty Bıbigúl Ahmetqyzy Tólegenova 2019 jylǵy 3 jeltoqsanda «Astana Opera» MOBT sahnasynda QR Mádenıet jáne sport mınıstrligimen birlese uıymdastyrylǵan mereıtoıyn atap ótti. Qanshama ónersúıer qaýym dańqty ánshimen kezdesýdi asyǵa kútti. Álemdik opera prımadonnasy Bıbigúl Tólegenova 90 jasqa tolýyna oraı izgi tilekterdi qabyl aldy. Osynaý quttyqtaý sharasyna ataqty qazaqstandyq opera ánshileri, shákirtteri – onyń dástúrin jalǵastyrýshylar, Bıbigúl Tólegenova atyndaǵy baıqaýdyń laýreattary men resmı tulǵalar atsalysty.

Igi ister

Teatr trýppasy mereke kúnderi Nur-Sultan qalasy ákimdiginiń «Qarttar men múgedekterge arnalǵan medıtsınalyq-áleýmettik mekeme» KMM, sonymen qatar Mamandandyrylǵan bóbekter úıinde qaıyrymdylyq kontsertterin berip turady. Buǵan qosa, Jańa jyl qarsańynda «Astana Opera» teatry qaıyrymdylyq kontsertter serııasyn usyndy. Ártister teatrǵa shaqyrylǵan «Áleýmettik kómek kórsetý ortalyǵynyń» múgedek balalaryna merekelik kóńil-kúı syılady.

Kameralyq zal qyzmetkerleri óskeleń urpaqtyń mýzykalyq talǵamyn qalyptastyra otyryp, jyl saıyn balalarǵa arnalǵan kontsertter qataryn keńeıtýde. Jetinshi maýsym ishinde aýdıtorııaǵa túrli jas sanattarynynyń tańdaýyna saı qyzyqty kontserttik baǵdarlamalar usynyldy.

Ómirdiń jańa kelbeti: jelidegi teatr

Karantın kezinde ujym TENGRI TV-den onlaın translıatsııa arqyly shamamen qyryq spektakl kórsetti. Ártister QR Mádenıet jáne sport mınıstrligimen uıymdastyrylǵan «Karantındegi juldyz» jobasyna belsene qatysty. Sondaı-aq teatr jurtshylyqqa óz ónimin – teatr ártisteriniń qatysýymen 15 onlaın joba usyndy. Olardyń qataryna Jeńis kúninde júzege asqan «Tyrnalar» onlaın jobasy, balet termınderi men zamanaýı bıdiń erekshelikteri týraly sóz qozǵaǵan Serik Naqyspekovtiń qatysýymen «Balet jáne onyń qyr-syry» jobasynyń eki shyǵarylymy endi. 7 mamyr kúni Qazaqstan jáne Reseı mýzykanttarynyń qatysýymen kompozıtordyń 180 jyldyǵyna arnalǵan «Chaıkovskıı. Online» kontserti usynyldy. Ondaǵan ártister «Mereke bıdi» oryndady, budan bólek «Astana Operanyń» tanymal solısteri men Italııa, Meksıka, Japonııa, Qytaı, Rýmynııa, Grýzııanyń opera juldyzdary, sonymen birge «Astana Opera» sımfonııalyq orkestriniń mýzykanttary «O sole mio» neapolıtandyq ánin oryndady. Uly aqyn Abaı Qunanbaevtyń 175 jyldyǵyna arnalǵan onlaın joba ujym qyzmetiniń mańyzdy kezeńine aınaldy. Balalar stýdııasynyń jas ártisteri J.Bızeniń «Karmen» jáne E.Brýsılovskııdiń «Qyz Jibek» operalarynan onlaın kórinister oryndady. Olardyń eresek áriptesteri – «Astana Opera» sımfonııalyq orkestriniń ártisteri Qazaqstannyń eńbek sińirgen qaıratkeri, maestro Abzal Muhıtdınniń jetekshiligimen J.Bızeniń «Karmen» operasynan ývertıýrany da onlaın rejımde usyndy. «Astana Operanyń» jetekshi solısi, opera juldyzy Maıra Muhamedqyzy dúnıejúzi dárigerlerine arnaý – Vangelıstiń «Búkilálemdik duǵasyn» oryndady. Sonymen qatar ujym teatrdyń YouTube arnasynda qoljetimdi basqa da tartymdy jobalardy iske asyrdy.

Josparlar týraly

«Elimizdegi epıdemıologııalyq jaǵdaı múmkindik berse, qyrkúıek aıynyń sońynan keshiktirmeı teatrda jańa maýsymdy ashý josparlanyp otyr. Asqaq ónerdiń barlyq jankúıerleriniń nazaryna jarqyn premeralar, Kameralyq zaldaǵy mazmundy kontsertter usynylmaq, sondaı-aq ónersúıer qaýymdy súıikti ártisterimen kezdesýler, qoltańba sessııalary jáne taǵy basqa qyzyqtar kútýde», - dedi teatrdyń baspasóz qyzmetinen.

Bizdiń kanalymyzǵa jazylyńyz:

Bólisińiz:
Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT