Astana kúnine oraı qandaı sharalar ótedi
2022 jylǵy 5 shilde 19:19

Astana kúnine oraı qandaı sharalar ótedi

NUR-SULTAN. QazAqparat – Astana kúnine oraı birqatar shara ótedi. Bul týraly QazAqparat ákimdikke silteme jasap habarlaıdy.

Biraq qalanyń 24 jyldyǵyna oraı kontsertterden bastap sporttyq festıvalderge deıin ondaǵan túrli is–sharalar ótkiziledi.

Astana kúninde qalada birqatar áleýmettik nysandardyń (kezekte turǵandarǵa páter kiltterin tapsyrý), zaýyttyń, skverlerdiń, qoǵamdyq keńistikterdiń, 80-nen astam aýla aýmaqtarynyń jáne t. b. ashylýy ótedi.

Sonymen qatar osy kúnge oraı qalanyń birqatar vedomstvolyq baǵynysty uıymdary kontsertter, sporttyq týrnırler, kórmeler jáne t. b. uıymdastyrady.

1-6 shilde aralyǵynda «Atameken» etno-memorıaldyq kesheninde «Elorda peızajdary» atty art-kórme jumys isteıdi.

Birikken mýzeıler dırektsııasy merekege oraı birden birneshe ekspozıtsııa uıymdastyrady: 1-8 shilde aralyǵynda – «El tiregi – Elorda» kórmesi ótedi.

Osy ýaqytta «Astana Opera» opera jáne balet teatry «Shopenıana» jáne «Shehrezada» kúmis dáýiriniń baletterin usynady.

5 jáne 6 shildede «Kolızeı» sport keńistiginde «Otan Ana» monýmentiniń janynda strıtboldan «Nur Sultan Cup» týrnıri uıymdastyrylady.

5-9 shilde aralyǵynda «Astana Balet» teatry «Orfeı jáne Evrıdıka» baletiniń premerasyna shaqyrady.

Astana kúni, 6 shildede saǵat 11:00-de Trıatlon parkte «Elorda Tolqyny» sporttyq jarysy bastalady. Osy ýaqytta «Qazanat» ıppodromynda shabandozdar «Elorda kýbogy» úshin báıge túrlerinen baq synaıdy.

Keshke, saǵat 21:00 – de Amfıteatr sahnasynda Ulyqpan Joldasov «Aq qanat-aq qusym» baǵdarlamasymen óner kórsetedi.

Saǵat 18:00-den 22: 00-ge deıin «Astana-Arena» stadıonynyń turaǵynda dástúrli Open air «Halyqpen birge» ótedi. Sol kúni keshke «Qazaqstan» OKZ «Dos-Muqasan» ansambliniń shyǵarmashylyǵyna arnalǵan «Dalam meniń» kontserti uıymdastyrylady.

8 shildede Amfıteatrda «Men seni súıemin, meniń astanam» atty kontserttik qoıylym ótedi. «Barys Arena» muz saraıynyń janynda 12 saǵattyq Open air «You Fest» sharasyn ótkizý 20 shildege aýystyryldy.

Aıta keteıik, Astana kúnine arnalǵan is-sharalar maýsym aıynda bastaldy. Máselen, Ermurat Úsenovtyń 70 jyldyǵyna arnalǵan «Ómir dastan» kontserti, erler men áıelder arasyndaǵy bokstan «Elorda kýbogy» halyqaralyq týrnıri, kórmeler, sondaı-aq Ulttyq dombyra kúnin merekeleý uıymdastyryldy.


Uqsas jańalyqtar

Jańalyqtar

Úrdis

MURAǴAT