Astana kúnine oraı Almatyda kontserttik is-sharalar ótedi
2022 jylǵy 5 shilde 21:26

Astana kúnine oraı Almatyda kontserttik is-sharalar ótedi

ALMATY. QazAqparat - Astana kúnine oraı Almatynyń túrli aýdandarynda kontsertter men buqaralyq oıyn-saýyq is-sharalary ótedi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.

Qalalyq ákimidiktiń málimetinshe, Gorkıı atyndaǵy ortalyq mádenıet jáne demalys saıabaǵynda saǵat 12.00-de qalanyń shyǵarmashylyq ujymdarynyń qatysýymen merekelik kontsert ótedi. Baǵdarlamaǵa balalardyń belsendiligi men konkýrstar kiredi.

Shyǵarmashylyq ujymdardyń qatysýymen kontsertter kelesi oryndarda ótedi:

• 12.00 – Túrksib aýdanynda – Saýranbaev jáne Spartak kósheleriniń qıylysynda;

• 15.00 – Seıfýllın kóshesindegi Mega Park saýda-oıyn-saýyq ortalyǵynyń janynda;

• 18.00 – Shuǵyla, 347 mekenjaıdaǵy Naýryzbaı aýdany ákimdiginiń janyndaǵy alańda.

Saǵat 20.00-de Respýblıka saraıynyń janyndaǵy Abaı alańynda «101» toby, Parvız Nazarov, «Keshıý» toby, «Úrker» toby, Aıdana Medenova, Nurjan Kermenbaev, Serik Ibragımov jáne t.b. estrada juldyzdarynyń qatysýymen ashyq aspan astynda úlken kontsert ótedi.

Eske salaıyq, búgin Premer-Mınıstrdiń orynbasary Eraly Toǵjanov elorda kúnin toılaýǵa qatysty «Biz bir adamnyń týǵan kúnin emes, astana kúnin toılaımyz», - degen pikir aıtqan edi.


Jańalyqtar

Úrdis

MURAǴAT