Jańalyqtar  >

Áskerı-teńiz kúshteriniń bas qolbasshysy Kaspııdegi áskerı nysandardyń qyzmetin tekserdi

2022 jylǵy 30 qyrkúıek, 03:00
Áskerı-teńiz kúshteriniń bas qolbasshysy Kaspııdegi áskerı nysandardyń qyzmetin tekserdi

ASTANA. QazAqparat - Áskerı-teńiz kúshteriniń kemeleri Áskerı-teńiz kúshteriniń bas qolbasshysy kontr-admıral Sáken Bekjanovtyń basshylyǵymen ótkizilgen jıyn-joryqtan oraldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Joryq barysynda «Qazaqstan», «Oral», «Saryarqa», «Mańǵystaý» zymyran-artıllerııalyq korablderi men «Jaıyq» gıdrografııalyq kemesi ekıpajdardyń úılesimin jetildirýge baǵyttalǵan is-qımyldar pysyqtaldy.

«Jıyn-joryq – bul komandırler men basqarý organdarynyń taktıkalyq daıarlyǵyn jetildirý, kemeler ekıpajdarynyń jaýyngerlik ázirligin baǵalaýǵa arnalǵan qorytyndy is-shara.

Taktıkalyq oqý-jattyǵý barysynda Áskerı-teńiz kúshteriniń jeke quramy ózara is-qımyl jasaýdy, kúshter men quraldardy basqarýdy, olardy jaýyngerlik, moraldyq-psıhologııalyq jáne materıaldyq-tehnıkalyq qamtamasyz etýdi uıymdastyrýdy pysyqtady», – dep túsindirdi ártekti kemeler dıvızıonynyń shtab bastyǵy 3 dárejeli kapıtan Murat Baımuhanov.

Áskerı-teńiz kúshteriniń oqý jylyndaǵy jaýyngerlik daıyndyǵynyń sońǵy kezeńiniń ereksheligi taıaz sýda júzý boldy.

Navıgatsııalyq qaýipsizdikti qamtamasyz etý jáne tótenshe jaǵdaılardyń aldyn alý mindetterin oryndaý úshin keme komandırleri men ózge de mamandar teńiz manevrleriniń aýdanyn zerdeledi. Sonymen qatar jeldiń basym baǵytyna, aǵysqa jáne kórinýine baılanysty gıdrometeorologııalyq jaǵdaılarǵa erekshe nazar aýdaryldy.

Ekıpajdar kúndizgi, túngi ýaqytta áýe, teńiz nysanalary men júzbeli mına boıynsha jaýyngerlik jattyǵýlardy oryndady.

Kemelerdi birlesip manevrleý boıynsha korabldik jaýyngerlik oqý-jattyǵýlaryn ótkizdi. Kúrdeli gıdrometeorologııalyq jaǵdaılarda teńizden ótý máselelerin pysyqtady.


Seriktester jańalyqtary

Jańalyqtar