Áskerge barýdan qashqan stýdentter vıdeosyna mınıstrlik túsinikteme berdi
2022 jylǵy 28 maýsym 22:45

Áskerge barýdan qashqan stýdentter vıdeosyna mınıstrlik túsinikteme berdi

NUR-SULTAN. QazAqparat – Qorǵanys mınıstrligi áskerı komıssarıat qyzmetkerlerinen tereze arqyly qashqan kolledj stýdentteriń áreketine qatysty pikir bildirdi, dep habarlaıdy QazAqparat tilshisi.

Áleýmettik jelilerde «Áskerge áketpek bolǵan komıssarıat qyzmetkerlerinen tereze arqyly qashyp bara jatqan kolledj stýdentteri», degen mátini bar vıdeo tarady. Beınematerıalda aıtylǵandaı, bul jaǵdaı stýdentterdiń dıplom qorǵaý sátinde bolǵan.

Osy jaǵdaıǵa baılanysty Qorǵanys mınıstrligi áskerı qyzmetke shaqyrýǵa jatatyn azamattar jergilikti basqarý organynyń shaqyrý qaǵazy boıynsha kelýge mindetti ekenin habarlady. Shaqyrý qaǵazyn jergilikti áskerı basqarý organdarynyń ókilderi azamattyń jeke ózine nemese jumys, oqý ornynyń uıym basshysyna tapsyrady.

«Bul oqıǵa osydan shamamen 10 kún buryn bolǵan. Onyń nege sońǵy birneshe kúnde bulaı tarap ketkenin bilmeımiz. Biz ol áskerge shaqyrylǵan jastar men olardyń ata-analarymen sóılestik. Olar dıplom alyp jatqan túlekter. Sondyqtan olar oqýdy aıaqtaǵan bolyp sanalady. Tıisinshe medıtsınalyq tekseristen ótý úshin kelýge mindetti. Olardy áskerı komıssarıat qyzmetkerleri kúshtep áketpeıdi. Tek olardy medıtsınalyq tekseriske shaqyrǵan», - dep málim etti mınıstrliktiń baspasóz qyzmeti.

Vedomstvo málimetinshe, azamattardy áskerge shaqyrý jumystaryn uıymdastyrý, oryndaý jergilikti ákimdikterge júkteledi. Sonymen qatar mnıstrlik merzimdi áskerı qyzmetke irikteý birneshe kezeń boıynsha júrgiziletinin atap ótti. Áýeli azamat medıtsınalyq tekserýden, keıin psıhologııalyq irikteýden jáne áskerı basqarmanyń ókilderimen áńgimelesýden ótedi.

«Tájirıbe kórsetkendeı, áskerge shaqyrylǵandar men olardyń ata-analary zańnama talaptaryn elemeıdi. Shaqyrý qaǵazyn alǵan azamattar shaqyrý komıssııasyna kelmeıdi. Al olardy májbúrlep ákelý múmkin emes. Sondaı-aq zańǵa sáıkes shaqyrý qaǵazyn azamattyń jeke ózine tapsyrý múmkin bolmaǵan jaǵdaıda onyń kelýin qamtamasyz etý mindeti Іshki ister organyna júkteledi», - dep habarlady vedomstvo.

Qorǵanys mınıstrliginiń málimetinshe, oqý ornynyń basshylyǵymen kelisilgen tártipte oqýdy támámdap jatqan túlekterge túsindirý jumystary júrgizilýde. Sonymen qatar olardyń áskerı qyzmetke jaramdylyǵyn anyqtaý úshin medıtsınalyq komıssııaǵa shaqyrý qaǵazdary tapsyrylyp jatyr.


Jańalyqtar

Úrdis

MURAǴAT