Áskerden kelgen jastarǵa ýnıversıtetke túsýge qandaı múmkindikter bar
ASTANA. QazAqparat – QR Qorǵanys mınıstriniń keńesshisi Aıgúl Tólembaeva merzimdi áskerı qyzmetin ótkergen jastarǵa oqýǵa túsý úshin qandaı jeńildikter qarastyrylǵanyn túsindirdi, dep habarlaıdy QazAqparat tilshisi.
«2022 jyldan bastap Qorǵanys mınıstrligi áskerı qyzmettiń bedelin arttyrý, onyń ishinde QR Qarýly kúshteriniń, basqa da áskerı quralymdar qatarynda merzimdi áskerı qyzmettiń belgilengen merzimin ótkergen azamattar úshin bilim berý jeńildikterin alý jumysyna bastamashy boldy. Bul jobaǵa jastar oń pikirlerin aıtyp jatyr», - dedi A. Tólembaeva ortalyq kommýnıkatsııalar qyzmetindegi baspasóz máslıhatynda.
Osy oraıda ol merzimdi áskerı qyzmettiń belgilengen merzimin ótkergen azamattarǵa beriletin jeńildikterge toqtaldy.
Birinshiden, qyzmet aıaqtalǵannan keıin UBT-ny eskermesten eki jyl ishinde aqyly negizde JOO-ǵa oqýǵa túsý múmkindigi bar.
«Ekinshiden, jaýyngerlik daıarlyqta, júktelgen mindetterdi oryndaýda joǵary nátıjelerge qol jetkizgen jáne úlgili áskerı tártibimen erekshelengen áskerı qyzmetshilerge UBT tapsyrmaı-aq, JOO esebinen oqý quqyǵy beriledi. Budan ózge, oqý ornynyń áskerı kafedrasynda emtıhansyz tegin oqýǵa bolady. Atap aıtqanda, merzimdi áskerı qyzmetin ótep shyqqandar qatardaǵy jaýynger bolady. Al eger ofıtser shenin alǵysy kelse, olar áskerı kafedrada bilim alyp, leıtenant atanady», - dedi mınıstrdiń keńesshisi.
Bul kelisim áskerı qyzmet ótkergen jáne orta mektepti bitirgeni týraly attestaty, tehnıkalyq, kásiptik, orta bilimnen keıingi nemese joǵary bilimi bar adamdarǵa qatysty.
Sonymen qatar, merzimdi áskerı qyzmetten ótkender QR Qorǵanys mınıstrligi oqý oryndaryna emtıhansyz túse alady.
