Asqar Mamın Mańǵystaý oblysynyń áleýmettik-ekonomıkalyq damýymen tanysty
2021 jylǵy 27 qarasha 19:46

Asqar Mamın Mańǵystaý oblysynyń áleýmettik-ekonomıkalyq damýymen tanysty

AQTAÝ. QazAqparat - QR Premer-Mınıstri Asqar Mamın Mańǵystaý oblysyna jumys sapary aıasynda óńirdiń áleýmettik-ekonomıkalyq damýy máseleleri boıynsha keńes ótkizdi jáne óńdeý ónerkásibi, densaýlyq saqtaý, tirshilikti qamtamasyz etý jáne týrıstik ınfraqurylym salalaryndaǵy jobalardyń iske asyrylýyn tekserdi. QazAqparat bul týraly primeminister.kz saıtyna silteme jasap habarlaıdy.


Mańǵystaý oblysynyń ákimi Nurlan Noǵaev, Energetıka mınıstri Maǵzum Myrzaǵalıev, Ekologııa, geologııa jáne tabıǵı resýrstar mınıstri Serikqalı Brekeshev, Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev, «QazMunaıGaz» AQ» basqarma tóraǵasynyń orynbasary Danııar Berlibaev jáne taǵy basqalary baıandama jasady.

Bıyl 4 qarashada Úkimet Qaýlysymen Mańǵystaý oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary qabyldandy. Onda 2,1 trln teńge somasyna 214 is-sharany iske asyrý kózdelgen.

Munaı-gaz sektoryn, óńdeý ónerkásibin, týrızmdi, kólik pen logıstıkany damytý mindeti qoıyldy. Áleýmettik, ınjenerlik-kommýnaldyq ınfraqurylymdy damytý boıynsha jobalar iske asyrylatyn bolady. Qabyldanǵan sharalar esebinen óńir halqynyń 100% sapaly aýyz sýmen qamtamasyz etiledi. Keshendi jospardy iske asyrý 60 myńǵa jýyq jańa jumys oryndaryn qurýdy, ónerkásip kóleminiń 27%, halyqtyń naqty tabysynyń 40% jáne jalpy óńir ekonomıkasynyń 32% ósýin qamtamasyz etedi.

Bıylǵy jyldyń 10 aıynda Mańǵystaý oblysynda óńdeý ónerkásibiniń kólemi 4,1% ósip, 150,2 mlrd teńgeni qurady, aýyl sharýashylyǵynyń jalpy óniminiń kólemi 17,1 mlrd teńgege jetti (+1%). Negizgi kapıtalǵa salynǵan ınvestıtsııalar ósimi 0,6% (473,9 mlrd teńge) qurady. Qurylys jumystarynyń kólemi 22,8% (193,8 mlrd teńge) ulǵaıdy, 954,1 myń sharshy metr turǵyn úı paıdalanýǵa berildi.


Premer-Mınıstr Mańǵystaý oblysynyń áleýmettik-ekonomıkalyq damýynyń 2021-2025 jyldarǵa arnalǵan keshendi josparynyń ýaqytyly ári sapaly oryndalýyn qamtamasyz etýdi tapsyrdy.

Keńes barysynda halyqty taza aýyz sýmen qamtamasyz etý máselesine erekshe nazar aýdaryldy. 2025 jylǵa deıin óńirde jalpy qýaty 286 myń tekshe metr bolatyn sýdy tuylandyrýdyń 9 jobasyn iske asyrý josparlanyp otyr. Onyń ishinde qýaty táýligine 35 myń tekshe metr bolatyn 3 joba 2022 jyldyń birinshi jartyjyldyǵynda paıdalanýǵa beriledi.


Úkimet basshysy jylyna 120 myń jup aıaq kıim shyǵaratyn «Zhamal-ai Ltd» aıaq kıim jáne arnaıy kıim shyǵaratyn fabrıkanyń jumysymen tanysty.
Aqtaý qalasyndaǵy onkologııalyq dıspanserdi aralaý kezinde Premer-Mınıstrge Mańǵystaý oblysynyń densaýlyq saqtaý júıesiniń damýy týraly baıandaldy.
A. Mamın «MAEK-Qazatomónerkásip» JShS energetıkalyq keshenin jańǵyrtý jobalarymen tanysty – 2030 jylǵa deıin JEO-2-de bý-gaz qondyrǵysyn, sondaı-aq jıyntyq qýaty táýligine 24 myń tekshe metr eki tuylandyrý qondyrǵysyn salý josparlanýda. Úkimet basshysy sondaı-aq Aqtaý qalasynyń týrıstik aımaǵyn damytý jobalarynyń iske asyrylýyn tekserdi.



Uqsas jańalyqtar

Jańalyqtar

Úrdis

MURAǴAT