Asqar Mamın Qostanaıda traktor zaýytynyń ashylýyna qatysty

QOSTANAI. QazAqparat – Úkimet basshysy Asqar Mamın Qostanaı oblysyna jumys sapary barysynda traktor zaýytynyń ashylýyna qatysty, dep habarlaıdy QazAqparat tilshisi.

Aıta ketsek, bıylǵy sáýir aıynda Asqar Mamın elordada «Peterbýrg traktor zaýyty» AQ dırektory Sergeı Serebrıakovpen kezdesý ótkizdi. Onyń barysynda QR men RF arasyndaǵy yntymaqtastyq máseleleri, sondaı-aq Qazaqstanda «Kırovets» traktorlary óndirisin damytý perspektıvalary talqylandy. Búgin Qostanaıda ashylyp otyrǵan kásiporynnyń saltanatty iske qosylýyna Úkimet basshysy arnaıy qatysty.

«Jańa zaýyt jylyna 500-den 700-ge deıin alyp traktorlardy qurastyrýǵa qaýqarly. Nátıjesinde eldegi aýyl sharýashylyǵy tehnıkalarynyń óndirisi jańa qarqyn alady. Sonymen qatar oblysta 500 turaqty jumys orny ashylady. Eki el arasyndaǵy birlesken jobalar jalǵasa beredi»,- dedi A. Mamın.

Qostanaı traktor zaýyty Indýstrııalyq aımaqta ornalasqan. «Kırovets» traktorlarynyń quny 45 mln teńgeden bastalady. Qazirdiń ózinde alty alyp tehnıka satylymǵa shyqty.

Úkimet delegatsııasynyń sapary Qostanaı úı qurylysy kombınatynda jalǵasady.