Ashhabadtaǵy Kaspıı sammıtinde Jaıyqtyń problemasy kóterildi
2022 jylǵy 29 maýsym 18:27

Ashhabadtaǵy Kaspıı sammıtinde Jaıyqtyń problemasy kóterildi

AShHABAD. QazAqparat – QR Prezıdent Qasym-Jomart Toqaev altynshy Kaspıı sammıtinde Jaıyqtyń problemasyn kóterdi, dep habarlaıdy QazAqparat tilshisi.

«Kaspıdiń ekojúıesin saqtap qalý bizdiń áriptestigimizdiń mańyzdy baǵyty bolyp qala beredi. Ekonomıkanyń damýy men Kaspıı mańyndaǵy mıllıondaǵan turǵynnyń baqýatty tirshiligi transshekaralyq sý qoımasynyń tabıǵı ortasy qalaı saqtalatynyna baılanysty. Jer qoınaýyn belsendi paıdalaný, teńiz arqyly resýrstardy tasymaldaý óńirdiń ekologııasyna salmaqty qater tóndirýi múmkin», - degen Prezıdent Jaıyqtyń jaǵdaıyna erekshe toqtaldy.

Memleket basshysynyń aıtýynsha, jahandyq jylyný sý resýrstaryna qater tóndirip tur.

«Qazir biz Jaıyqty qutqarý baǵytynda kelisilgen ári yqpaldy sharalar qabyldaýymyz kerek. Áıtpese kóp ýaqyt ótpeı qutqaratyn ózen de qalmaıyn dep tur. Taraptardyń bárin kúsh biriktirip, Jaıyqtyń ahýalyn jaqsartatyn ortaq jospar qurýǵa shaqyramyz», -dedi Qasym-Jomart Toqaev.

Eske salsaq, búgin Qazaqstan Prezıdenti Kaspıı mańy memleketteri basshylarynyń altynshy sammıtine qatysý úshin Ashhabad qalasyna jumys saparymen keldi.

Sapar aıasynda Qasym-Jomart Toqaev Túrikmenstan Prezıdenti Serdar Berdimuhamedovpen jáne Túrikmenstannyń burynǵy Prezıdenti, Halyq Máslıhaty Ulttyq keńesiniń tóraǵasy Gýrbangýly Berdimuhamedovpen kezdesti.


Foto: aprk.kz

Seriktester jańalyqtary

Jańalyqtar

Úrdis

MURAǴAT