قازاقستاننىڭ قىتايداعى ەلشىلىگى ارنايى موبيلدى قوسىمشاسىن ىسكە قوستى
28 ماۋسىم 21:29

قازاقستاننىڭ قىتايداعى ەلشىلىگى ارنايى موبيلدى قوسىمشاسىن ىسكە قوستى

بەيجىڭ. قازاقپارات - اقپاراتتىق تەحنولوگيالاردى ەنگىزۋ ارقىلى ق ر ازاماتتارى ءۇشىن اقپارات پەن قىزمەتتەردىڭ قولجەتىمدىلىك دەڭگەيىن ارتتىرۋ ماقساتىندا، قازاقستاننىڭ قىتايداعى ەلشىلىگى «Kaz Consul» ارنايى موبيلدى قوسىمشاسىن ىسكە قوستى، دەپ حابارلايدى قازاقپارات ەلىمىزدىڭ قىتايداعى ەلشىلىگىنە سىلتەمە جاساپ.

بۇگىن وسى موبيلدى قوسىمشانىڭ ونلاين-تانىستىرىلىمى ءوتىپ، قاتىسۋشىلار ينتەرفەيستىڭ ىڭعايلىعى مەن قازاق جانە ورىس تىلدەرىندە جاريالانعان اقپاراتتىڭ وزەكتىلىگىن جوعارى باعالادى.

ەندى قازاقستاندىقتار قىتايدىڭ كەز كەلگەن ايماعىندا بولا وتىرىپ، WeChat موبيلدى پلاتفورماسىنداعى «Kaz Consul» پاراقشاسىنا كىرۋ ارقىلى نەكە قيۋ، تۋۋ تۋرالى كۋالىك، ۇلتتىق پاسپورت، ە ت س ق كىلت الۋ، سونداي-اق نوتارياتتىق ءىس-ارەكەتتەر جاساۋ سەكىلدى مەملەكەتتىك قىزمەتتەر بويىنشا ءتيىستى اقپاراتتى الادى.

سونىمەن قاتار، موبيلدى قوسىمشادا كونسۋلدىق وكرۋگتەردىڭ كارتاسى ۇسىنىلعان جانە كونسۋلدىق ەسەپكە ونلاين تۇرۋ مۇمكىندىگى قاراستىرىلعان.

بۇدان باسقا، «Kaz Consul» موبيلدى قوسىمشاسىندا كورسەتىلگەن تەلەفوندار ارقىلى ءبىزدىڭ ازاماتتار ق ح ر اۋماعىنداعى قازاقستاننىڭ كونسۋلدىق مەكەمەلەرىنىڭ كەز كەلگەن قىزمەتكەرىمەن تىكەلەي بايلانىسا الادى.

جاڭالىقتار