بالا اۋىرعاندا قۇيرىق مايمەن ەمدەۋ قانشالىقتى دۇرىس؟
28 ماۋسىم 18:42

بالا اۋىرعاندا قۇيرىق مايمەن ەمدەۋ قانشالىقتى دۇرىس؟

نۇر-سۇلتان. قازاقپارات – بالا اۋىرعاندا قۇيرىق مايمەن ەمدەۋ قانشالىقتى دۇرىس؟ بۇعان تاجىريبەلى پەدياتر مايرا ايتۋار قىزى Sputnik قازاقستان اگەنتتىگىنە بەرگەن سۇحباتىندا جاۋاپ بەردى.

مايرا ايتۋار قىزىنىڭ سوزىنشە، تۇماۋمەن اۋىرىپ تۇرعان بالانىڭ دەنەسىن مايمەن سىلاعان دۇرىس ەمەس.

«بۇرىن دا، قازىر دە نارەستە اۋىرسا، بىردەن قۇيرىق مايمەن سىلاپ، ەمدەپ الامىز دەپ ويلايتىن. ءبىراق بالانىڭ كەۋدەسىن مايمەن سىلاۋ - تۇماۋ كەزىندەگى ەڭ ۇلكەن قاتەلىك. سەبەبى ول اۋرۋدى ودان ءارى اسقىندىرىپ، وبسترۋكتيۆتى برونحيتكە اكەلىپ سوعادى. ياعني، تىنىس جولدارىنىڭ ءىسىنۋى مەن قابىنۋى پايدا بولادى»، - دەيدى پەدياتر.

مايرا ايتۋار قىزىنىڭ ايتۋىنشا، دەنساۋلىق ساقتاۋ مينيسترلىگى بەكىتكەن ەشبىر حاتتامادا، حالىقارالىق دەڭگەيدەگى ستاندارتتاردا قۇيرىق مايمەن ەمدەۋ ءادىسى قولدانىلمايدى. تەك حالىق ەمشىلىگىندە عانا كەڭىنەن پايدالانىلادى.

ودان بولەك قۇيرىق مايدى ەم رەتىندە قولدانعان كۇننىڭ وزىندە ونى دارىلىك ماقساتتا پايدالانۋدى بىلەتىن ەمشى تەمپەراتۋرانى ەسكەرۋى كەرەك، دەيدى ول.

«ءبىر جاستان اسقان بالالاردى دەنە قىزۋى جوق كەزدە سىلاسا بولادى. قىس مەزگىلىندە بەت پەن قول جارىلماس ءۇشىن قولدانۋعا جاقسى بولار. ەم رەتىندە پايدالانۋعا بولادى ەكەن دەپ كەز كەلگەن ۋاقىتتا، بالانىڭ ەرەكشەلىگىن ەسكەرمەي ىسكە كىرىسپەگەن ءجون. ويتكەنى ونىڭ يىسىنە كەي بالادا لوقسۋ بولۋى مۇمكىن. كەيبىرىندە اللەرگيا پايدا بولادى»، - دەيدى پەدياتر.

دارىگەر تاجىريبەسىندە قۇيرىق مايدى شامادان تىس ىسىتىپ بالانى سىلاعان ۋاقىتتا، دەنە قىزۋى كوتەرىلىپ، سوڭى پنيەۆمونياعا اكەلگەن جاعدايلار دا بولعانىن اتاپ ءوتتى.

«سانيتارلىق تالاپتار ساقتالماعاننان، قۇيرىق مايدى ۇزاق ساقتاعاننان ونىڭ ەمدىك قاسيەتتەرى جويىلادى. كەيبىر بالالاردا لوقسۋ بولىپ، تابەتى تومەندەيدى. تاجىريبەمدە جاڭا تۋعان نارەستەنى قۇيرىق مايمەن سىلاپ، ارتىنان ونى بەسىككە بولەگەن ساتتەر بولعان. كەيىن تەرمورەتتەلۋ ورتالىعى ءالى قالىپتاسپاعان بالانىڭ قىزۋى ارتىپ، تىنىس الۋى ناشارلاپ، وكپە قابىنۋىمەن جانساقتاۋ بولىمىنە تۇسكەن. سوندىقتان دا پەدياتر رەتىندە قۇيرىق مايمەن سىلاۋعا بولادى دەپ كەڭەس بەرگەن ەمەسپىن»، - دەيدى مايرا ايتۋار قىزى.

سونىمەن قاتار مايرا ايتۋار قىزى ەمدىك ماقساتپەن بالاعا 3-4 ايىنان باستاپ قۇيرىق ماي سورعىزۋدى دا دۇرىس دەپ سانامايتىنىن جەتكىزدى. ايتۋىنشا، سابيدە قۇنارلى زاتتاردى ەرىتەتىن بەز ءالى تولىق قالىپتاسپاعان. سالدارىنان بۇلدىرشىندەردە گاستريت، ءوت جانە ىشەك جولدارىنىڭ اۋرۋى پايدا بولۋى مۇمكىن.

«5 جاستان اسقان بالالارعا، اسقورىتۋ جۇيەسى دۇرىس قالىپتاسقان بالالارعا ەمدىك ماقساتپەن قۇيرىق مايدى پايدالانۋعا ەشقانداي قارسى كورسەتىلىمدەر جوق بولسا، ىستىق سۇتكە قوسىپ بەرەدى. جوتەلىن باسۋعا، قاقىرىق تۇسىرۋگە، تاماعى قىزارىپ اۋىرعان كەزدە قوسىمشا تەراپيا رەتىندە قولدانادى. ءبىراق ارنايى مەديتسينالىق كىتاپتاردا ولاي پايدالانۋعا بولادى دەپ جازىلماعان»، - دەيدى مامان.

سونداي-اق مايرا ايتۋار قىزى بالانىڭ دەنەسىنە ماسساج جاساۋ بارىسىندا قويدىڭ مايى تۇگىل ارنايى ءدارىحانادا ساتىلاتىن مايدى دا جاعۋعا بولمايتىنىن ەسكەرتتى.

«قازىرگى تاڭدا رەسەي جانە امەريكانىڭ مەديتسيناسى ونى (ماي-رەد.) تەك دارىگەردىڭ نۇسقاۋىمەن عانا قولدانۋ كەرەك ەكەنىن ايتۋدا. تەرىنىڭ ساڭىلاۋلارىن ءتۇرلى سۇيىقتىقپەن بىتەۋ - زات الماسۋ پروتسەسىن، دەنەنىڭ تىنىس الۋىن تەجەپ، فيزيولوگيالىق جەتىلۋىنە كەرى اسەرىن تيگىزەدى»، - دەيدى پەدياتر.

جاڭالىقتار