قاراعاندىدا ۆاكسينادان باس تارتۋدىڭ كەسىرىنەن بالالار اراسىندا تۋبەركۋلەز ءورشىپ تۇر
28 ماۋسىم 08:10

قاراعاندىدا ۆاكسينادان باس تارتۋدىڭ كەسىرىنەن بالالار اراسىندا تۋبەركۋلەز ءورشىپ تۇر

قاراعاندى. قازاقپارات - قاراعاندى دارىگەرلەرى بالالار مەن جاسوسپىرىمدەر اراسىندا تۋبەركۋلەزبەن سىرقاتتانۋ كورسەتكىشى ارتقانىن ايتادى.

مامانداردىڭ پىكىرىنشە، بۇل دەرتتىڭ ورشۋىنە اتا- انالاردىڭ ب س ج ۆاكسيناسىنان باس تارتۋى سەبەپ بولىپ وتىر، دەپ حابارلايدى قازاقپارات ءتىلشىسى.

قاراعاندى وبلىسىندا وسى جىلدىڭ 5-ايىندا بالالار اراسىندا تۋبەركۋلەزبەن سىرقاتتانۋ 28,6 پايىز، جاسوسپىرىمدەر اراسىندا 37,5 پايىز وسكەنى بايقالادى 100 مىڭ بالا سانىنا شاققاندا كورسەتكىش 2,1 دى قۇرادى، ال جاسوسپىرىمدەر اراسىندا 8 جاعداي تىركەلگەن، سىرقاتتانۋ كورسەتكىشى - 14,6. «وكىنىشكە قاراي، سوڭعى ۋاقىتتا بالالار دەنساۋلىعىنا جاۋاپ بەرەتىن اتا-انالاردىڭ ب س ج ۆاكسيناتسياسى مەن رەۆاكسيناتسياسىنان باس تارتۋى جيىلەپ كەتتى.

تۋعان بالالاردىڭ ىشىنەن 656 نارەستە ەكپە الماعان، پەرزەنتحانادا ۆاكسيناتسيامەن قامتىلماعاندار ۇلەسى 8,6 پايىز قۇرادى، ونىڭ ىشىندە ۋاقىتشا مەديتسينالىق شەتتەتۋ سەبەپتەرى بويىنشا - 4,5 پايىز (346 جاعداي) ، ۆاكسينادان باس تارتۋ سەبەپتەرى بويىنشا - 4 پايىز (302 جاعداي)، باسقا سەبەپتەر بويىنشا -0,6 پايىز (8 جاعداي)»، - دەپ مالىمدەدى قاراعاندى وبلىسىنىڭ سانيتارلىق ەپيدەميولوگيالىق باقىلاۋ دەپارتامەنتى.

د د ۇ ۇسىنىمىنا سايكەس تۋبەركۋلەزدىڭ اۋىرتپالىعى جوعارى ەلدەردە بۇكىل ەمشەكتەگى بالالار بتسج ۆاكسيناسىنىڭ 1 دوزاسىن تۋعاننان كەيىن مۇمكىندىگىنشە ەرتەرەك الۋى ءتيىس. سوڭعى بەس ايدا قاراعاندى وبلىسىندا 7624 ءسابي دۇنيەگە كەلگەن. پەرزەنتحانالار مەن بولىمشەلەردە 6968 بالا تۋبەركۋلەزگە قارسى ەگىلدى (91,4 پايىز) - بۇل سيفر د د ۇ ۇسىنعان 95 پايىزدان كەم ەمەس جانە رەسپۋبليكالىق كورسەتكىشتەن (93,2 پايىز) تومەن بولىپ وتىر.

«بالالار اراسىنداعى تۋبەركۋلەزدىڭ الدىن الۋدىڭ نەگىزگى شاراسى - ءسابي ءومىرىنىڭ العاشقى 1-4 كۇنىندە قارسى كورسەتىلىم بولماعان جاعدايدا پەرزەنتحانادا سالىناتىن ب س ج ۆاكسيناسى. ب س ج ۆاكسيناتسياسى بالالاردا وسى اۋرۋدىڭ الدىن الۋ ءۇشىن قاجەت جانە وتە ماڭىزدى. ول تۋبەركۋلەز قوزدىرعىشىن جۇقتىرۋدان قورعامايدى، ءبىراق جاسىرىن ينفەكسيانىڭ ايقىن اۋرۋعا وتۋىنە جانە تۋبەركۋلەزدىڭ جەدەل جانە جالپى تۇرلەرىنىڭ دامۋىنا جول بەرمەيدى»، - دەپ ءتۇسىندىردى دەپارتامەنت ماماندارى.

تۋبەركۋلەز الەمدەگى ەڭ كوپ تاراعان ينفەكسيالاردىڭ ءبىرى بولىپ قالا بەرەدى: الەمدە ونى ءاربىر ءۇشىنشى ادام جۇقتىرعان. حالىق اراسىندا تۋبەركۋلەزبەن سىرقاتتانۋدىڭ ءورشۋى بالالار اراسىندا جۇقتىرۋ دەڭگەيىنىڭ وسۋىنە ىقپال ەتىپ وتىر. ولار ەرەسەكتەرگە قاراعاندا بۇل اۋرۋعا كوبىرەك بەيىم كەلەدى.

اۆتور: اگاتا مۋحامەدجانوۆا

جاڭالىقتار