ادامدار نەگە ۇيىقتاپ جاتىپ سويلەيدى؟
27 ماۋسىم 20:31

ادامدار نەگە ۇيىقتاپ جاتىپ سويلەيدى؟

نۇر-سۇلتان. قازاقپارات - كەي ادامدار ۇيىقتاپ جاتىپ سويلەيدى دە، تاڭەرتەڭ ول تۋرالى ەشتەڭە بىلمەيدى. بۇل جاعدايدى مەديتسينادا سومنيلوكۆيا دەپ اتايدى.

ادەتتە، ۇيىقتاپ جاتىپ سويلەيتىن ادامدار ءوز مونولوگتارىن 30 سەكۋندتان ارتىق جۇرگىزبەيدى. ءبىراق كەيبىرەۋلەر ءبىر تۇندە كوپ رەت سويلەيدى. كەيدە ولار ءوز-وزدەرىمەن اڭگىمەلىپ جاتقانداي كورىنەدى. ال باسقا جاعدايلاردا ولار اينالاسىنداعىلارمەن اڭگىمە ايتىپ جاتقانداي سەزىم بولادى. ۇيىقتاپ جاتىپ سىبىرلاپ سويلەيتىندەر دە بار، ءبىراق كەيىن ول داۋىستاپ سويلەپ كەتۋى ابدەن مۇمكىن.

ادامدار نەلىكتەن ۇيىقتاپ جاتىپ سويلەيدى؟

كوپتەگەن ادام ومىرىندە ءبىر رەت بولسىن ۇيىقتاپ جاتىپ سويلەيدى، ال الەمدەگى %1,5 ادام كۇندە سويلەيدى. تۇندە بۇلاي سويلەۋ ادامعا تەرەڭ ءارى تىنىش ۇيىقتاۋعا كەدەرگى كەلتىرمەيدى. تۇندە سويلەۋ ۇيقىنىڭ بارلىق جاعدايىندا جانە ستادياسىندا بولا بەرە الادى. وكىنىشكە وراي، سومنيلوكۆيانىڭ نەلىكتەن پايدا بولاتىنىنا ناقتى جاۋاپ بەرۋ مۇمكىن ەمەس.

مىسالى، ول ۇيقىنىڭ جالپى بۇزىلۋىمەن، دارىلەر ىشۋمەن، كۇيزەلىسپەن، سوزىلمالى شارشاڭقىلىقپەن بايلانىستى بولۋى مۇمكىن. سونداي-اق وعان اپنوە جانە جاراقاتتان كەيىنگى بۇزىلىس سەبەپ بولا الادى. ىشىمدىككە سالىنعان جانە پسيحيكالىق بەلسەندى زاتتار كوپ ىشەتىن ادامدار دا ۇيىقتاپ جاتىپ ءجيى سويلەيدى.

ۇيىقتاپ جاتىپ سويلەۋدى ادامداردىڭ ۇيقى كەزىندە قالىپتى ۇيىقتاۋعا سايكەس كەلمەيتىن قوزعالىستار جاساۋمەن، ياعني پاراسومنيامەن دە بايلانىستىرادى. ولاردىڭ ەڭ تانىمالدارىنا ايكەزبە مەن تۇنگى قورقىنىشتار جاتادى.

ۇيقى كەزىندە ەرەسەكتەرگە قاراعاندا بالالار كوبىرەك سويلەيدى. ەگەر اتا-اناسى ۇيىقتاپ جاتىپ سويلەسە، بۇل ادەت بالادا دا قالىپتاسۋى مۇمكىن.

ۇيىقتاپ جاتىپ سويلەگەن ادامنىڭ تەك شىندىقتى ايتاتىنى راس پا؟

ۇيقى كەزىندە سويلەپ جاتقان ادامنان بارلىق قۇپيانى ءبىلىپ الۋعا بولادى دەگەن كەڭ تاراعان اڭىز بار. ول ءۇشىن ونىڭ شىناشاعىنان ۇستاپ، وعان سۇراق قويۋ كەرەك.

الايدا، بۇل وتىرىك. مۇنداي اقپارات الۋ ءادىسى جۇمىس ىستەمەيدى. ونى 2017-جىلى فرانسيادا جۇرگىزىلىپ، Sleep جۋرنالىندا جاريالانعان زەرتتەۋ دالەلدەدى. دەگەنمەن، زەرتتەۋشىلەر بىرنەشە قىزىقتى فاكت انىقتادى. مىسالى، ۇيقى كەزىندە وتە ءجيى ايتىلعان ءسوز - «جوق». %26 سويلەۋ ەپيزودتارى سۇراۋلى ەكپىندە بولعان. ءبىراق ۇيقى كەزىندە سويلەيتىن ادامداردىڭ باسىم كوپىشىلىگى ساناسىز سوزدەر مەن دىبىستار ايتاتىنى انىقتالعان.

سومنيلوكۆياعا تاپ بولساڭىز، نە ىستەۋ كەرەك؟

ءوزىڭىزدىڭ ۇيقىڭىز جاقسى قانۋى ءۇشىن جانە سىزبەن بىرگە تۇراتىن ادامداردى مازالاماس ءۇشىن بۇل پروبلەمامەن كۇرەسكەن دۇرىس. ول ءۇشىن الدىمەن سومنيلوكۆيانىڭ پايدا بولۋ سەبەبىن انىقتاۋ كەرەك. قانداي دا ءبىر ۋاقىت بويى ۇيقى جۋرنالىن جازىپ ءجۇرىڭىز. وعان كۇندە قانشا ۇيىقتايتىنىڭىزدى، تاۋلىكتىڭ قاي ۋاقىتىندا ۇيقىسىزدىقپەن جولىعاتىنىڭىزدى، قاي ۋاقىتتا قورقىنىشتى تۇستەر كورەتىنىڭىزدى نەمەسە ساعات نەشەدە ويانىپ كەتەتىنىڭىزدى جازىپ تۇرىڭىز. سودان سوڭ وسى جۋرنالمەن دارىگەرگە بارىڭىز. سول كەزدە دارىگەرگە پروبلەمانى ءتۇسىنۋ جانە پايدالى ءارى ءتيىمدى ۇسىنىستار ايتۋ جەڭىلىرەك بولادى.

سونداي-اق كۇنى بويى تاپ بولاتىن كۇيزەلىستەر مەن جۇكتەمەلەردى بارىنشا ازايتۋعا تىرىسىڭىز. ەگەر ول مۇمكىن ەمەس بولسا، بوساڭسۋ تەحنيكالارىنا جۇگىنىڭىز جانە كەشكىسىن ءجيى دەمالۋعا تىرىسىڭىز. ۇيقى ساپاسىن جاقسارتۋ ءۇشىن سپورتپەن اينالىسۋدى ۇمىتپاڭىز. جاتتىعۋعا، سوزىلۋعا نەمەسە تازا اۋادا سەرۋەندەۋگە كۇنىنە 15 مينۋت ءبولۋدىڭ ءوزى جاعىمدى ناتيجەلەر بەرەدى.

تۇنگى سويلەۋمەن كۇرەسۋدە ەسكەرۋ كەرەك تاعى ءبىر جايت - ۇيقىنىڭ دۇرىس كەستەسىن قۇرۋ: كۇندە ءبىر ۋاقىتتا جاتىپ، ءبىر ۋاقىتتا ويانۋ. ۇيقى جەتىدەن توعىز ساعاتقا دەيىن سوزىلۋى كەرەك.

ۇيىقتاۋعا ءبىر ساعات قالعاندا سمارتفون ەكرانى مەن تەلەديداردان دەمالۋ كەرەك. ۇيىقتار الدىندا جۇيكە جۇيەسىن قوزدىراتىن جانە جارقىن ەموتسيالار سىيلايتىن نارسەلەرمەن شۇعىلدانباڭىز. مىسالى، كومپيۋتەرلىك ويىندار ويناماڭىز، قورقىنىشتى فيلمدەر كورمەڭىز جانە سيۋجەتى ەلىكتىرگىش كىتاپتار وقىماڭىز.

تۇندە مي كۇنى بويى العان اقپاراتتى وڭدەيدى. سوندىقتان ۇيقى ساپاسى مەن ءتۇس سيپاتىنا ۇيىقتار الدىندا نە ىستەگەنىڭىز تىكەلەي اسەر ەتەدى.

massaget.kz

جاڭالىقتار