سەمەي قالاسىنىڭ جاڭا گەربى بەكىتىلدى
25 ماۋسىم 07:35

سەمەي قالاسىنىڭ جاڭا گەربى بەكىتىلدى

سەمەي. قازاقپارات - اباي وبلىسىنىڭ ورتالىعىنا اينالعان سەمەي قالاسىنىڭ جاڭا گەربى بەكىتىلدى، دەپ حابارلايدى قازاقپارات ءتىلشىسى.

بۇگىن سەمەي قالاسى ءماسليحاتىنىڭ كەزەكتى 25- سەسسياسى ءوتتى. وندا دەپۋتاتتار شاھار گەربىن بەكىتتى. گەربتىڭ شەڭبەر تۇرىندە بولۋى ماڭگىلىكتىڭ سيمۆولىن ايشىقتايدى.

«جاسىل ءتۇس - تابيعاتتىڭ، ۇيلەسىمدىلىك پەن تەپە- تەڭدىكتىڭ سيمۆولىن بىلدىرەدى جانە ول قايتا جاڭعىرۋمەن بايلانىستى. گەرالديكا زاڭدارى بويىنشا كۇن ءومىر جولىن سيپاتتايدى. گەربتىڭ ىشىندە - باقىت سيمۆولى تۇرىندەگى ويۋ- ورنەكپەن كومكەرىلگەن شاڭىراق بەينەسى بەينەلەنگەن»، - دەپ حابارلادى قالا اكىمدىگى.

ءتورت بولىكتىڭ اراسىندا كىتاپ، قاراعاي، تۇيە جانە كوپىردىڭ سۇلباسى بەينەلەنگەن. كىتاپ سەمەي قالاسىن قازاقستاننىڭ رۋحاني- مادەني ورتالىعى، اباي، شاكارىم، مۇحتار اۋەزوۆ سىندى ۇلى تۇلعالاردىڭ وتانى رەتىندە بەينەلەيدى.

«شاڭىراقتىڭ سول جاق بولىگىندە ورنالاسقان قاراعاي سۋرەتى ءوڭىردىڭ تابيعي بەينەسىنىڭ اجىراماس بولىگى رەتىندە كورسەتىلگەن. سەبەبى سەمەيدە بىرەگەي قاراعاي ورمانى ورنالاسقان. تۇيە - عاسىرلار جۇگىن ارقالاعان دالا كەمەسى ىسپەتتەس. ريەۆوليۋتسياعا دەيىن سەمەي قالاسى رەسەي مەن باتىس قىتاي قالالارىنىڭ ساۋدا ورتالىعى بولعان جانە جىبەك جولىنىڭ بولىگى سانالعان. جاڭا كوپىر - زاماناۋي جەتىستىكتەردىڭ كورسەتكىشى جانە قالانىڭ كورىكتى جەرى سانالادى»، - دەلىنگەن اقپاراتتا.

«سەمەي» اتاۋى سيمۆولدىڭ تومەنگى جاعىندا ورنالاسقان جانە التىن ارىپتەرمەن جازىلعان. التىن ءتۇس - ءال-اۋقات پەن وركەندەۋدىڭ سيمۆولى. سارى جانە كوك ءتۇستىڭ ارالاسۋى جاسىل تۇسكە اينالىپ، جومارتتىقتىڭ، جاندانۋدىڭ جانە جاقسى ءىستىڭ باستاماسىنىڭ سيمۆولىن بىلدىرەدى. «بەيبىتشىلىك» ارالىنىڭ «تۇيەمويناق» ستەلاسىنداعى جەتى قارلىعاشتىڭ بەينەسى - قىرىق جىلعى اتوم سىناقتارىن جەڭگەنىنىڭ ايقىن كورىنىسى.

قازاق حالقى ءۇشىن جەتى سانى قاسيەتتى، «جەتى ۇرپاق»، «جەتى قارا» جانە تاعى دا باسقا كوپتەگەن ۇعىمدار وسى سانمەن بايلانىستى.

وسىلايشا، سەمەي قالاسىنىڭ جاڭا گەربىندە قالانىڭ رۋحاني، تاريحي، تابيعي جانە زاماناۋي كەلبەتى كورىنىس تاپقان. گەربتىڭ اۆتورى - قالالىق مادەنيەت سارايىنىڭ قويۋشى سۋرەتشىسى ەرلان امىربەك.

اۆتور: تالعاتجان مۇحامەتبەك ۇلى

جاڭالىقتار