Atyraý oblysynda mektepti jóndeý kezinde 20 mln teńgeniń jumysy atqarylmaǵan
ATYRAÝ. QazAqparat – Atyraý oblysynda mektepti kúrdeli jóndeý kezinde 20 mln teńgeniń jumysy atqarylmaǵan, dep habarlaıdy QazAqparat.
Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Erlan Dosanovtyń deregine súıensek, Jylyoı aýdanynda jalǵan aktilerge qol qoıý arqyly bıýdjet qarajatyn urlaý táýekeli anyqtalǵan.
«Máselen, Qosshaǵyl aýylyndaǵy №2 jalpy orta bilim beretin mektep pen «SCS Injınırıng» JShS kúrdeli jóndeý júrgizýge jalpy somasy 414 mln teńgeden astam 3 shart jasaldy. Tapsyrys berýshi oryndalǵan jumystardyń aktilerine qol qoıdy. Aqysy tólendi. Alaıda, is júzinde jumys oryndalmady. Atap aıtqanda, mektep aýmaǵynyń qorshaýyn, ǵımarattyń ishki baspaldaq bóligin bólshekteý, sport zaldaryn, eńbek, kitaphana jáne ashana úı-jaıyn jóndeý, tsement quıý, gıdrooqshaýlaý, lınoleým jabynyn, keramıkalyq plıtka tóseý, mektep-ınternat ǵımaratynyń shatyryn qorshaý, ǵımarattyń tóbesinen sý aǵyzý, káriz qubyrlary, vagon qurylǵysy, shatyr jabynyna jylý oqshaýlaǵysh, shatyrǵa qorshaý ornatylmaǵan. Qazir júrgizilgen aýdıtorlyq tekseristiń qorytyndysyna sáıkes, oryndalmaǵan jóndeý jumystarynyń somasy 20 260 159 teńgeni quraıtyny anyqtaldy», -deıdi Erlan Dosanov.
Onyń aıtýynsha, Qosshaǵyl aýylyndaǵy mekteptiń kúrdeli jóndeý jumystary qarajatty jymqyrý qaýpinsiz ári sapaly aıaqtalýy tıis.
Eske sala ketelik, budan buryn Atyraý oblysy sybaılas jemqorlyqtyń aldyn alý boıynsha sońǵy orynda turǵanyn, aýdan ákimdigi úı qurylysy bitpese de, merdigerge 330 mln teńgeni aýdaryp jibergenin jazǵan edik.
Jańalyqtar
