Taǵy da sensatsııa: Marokko quramasy Belgııadan basym tústi
ASTANA. QazAqparat – Qatarda ótip jatqan fýtboldan 2022 jylǵy álem chempıonatynyń F tobynda sensatsııa tirkelip, Marokko quramasy Belgııadan basym tústi, dep habarlaıdy QazAqparat tilshisi.
Álemniń aldyńǵy qatarly quramasynyń biri sanalatyn Belgııa dop dodasynda ázirge ádemi oıyn órnegimen kózge túse almaı keledi. Alǵashqy týrda Kanadany 1:0 esebimen jeńgen olar ekinshi týrda jankúıerlerdi jigerli qımylmen jelpindiremiz degen nıet tanytqan edi.
Birinshi oıynynda Horvatııamen 0:0 esebimen teń túsken marokkolyq fýtbolshylar azýly qarsylasyna tegeýrindi qarsylyq kórsetti. Oıynnyń birinshi kezeńinde oıyn alma-kezek shabýylmen órbip jatty. Kez kelgen sátte tablodaǵy esepke ózgeris enýi múmkin bolatyn. Tipti, 45+3 mınýtta Hakım Zıesh tepken dop qaqpa torynda týlap jatty. Tóreshiler marokkolyq fýtbolshylar oıynnan tys qaldy degen sebeppen ony jaratpaı tastady.
Ekinshi kezeńde belgııalyq fýtbolshylar belsendi qımylymen kózge tústi. Degenmen, dittegen maqsatyna jete almaı jatty. Olardyń qatarynan Eden Azar tepken dopty marokkolyq qaqpashy Mýnır syrtqa shyǵaryp úlgerdi.
Odan keıingi ýaqytta Afrıka qurlyǵynyń ókilderi de qarsy shabýylǵa shyqty. Osyndaı sátterdiń birinde aıyp dobyn oryndaǵan Abdelhamıd Sabırı belgııalyq qaqpashynyń osal tusyn taýyp ketti. Al, 92-mınýtta Zakarııa Abýhlıal gol soǵyp, qorytyndy esepti belgiledi.
Osylaısha, álem chempıonatynda taǵy bir márte sensatsııa tirkeldi. Marokko quramasy Belgııadan 2:0 esebimen basym tústi.
Eske salsaq, búgin E tobynda Kosta-Rıka Japonııadan basym tústi.
Sondaı-aq, búgin atalǵan toptaǵy Ispanııa men Germanııa kezdesýi elorda ýaqytymen 1:00-de, al F tobyndaǵy Horvatııa men Kanada oıyny 22:00-de «Qazaqstan» men «Qazsport» telearnalarynan tikeleı efırde kórsetiledi.
Foto: STU FORSTER/GETTY IMAGES
