Óskemende alaıaq ıpoteka rásimdeýge kómektesemin dep 9 mln teńgeni qoldy etken
2022 jylǵy 27 mamyr 01:12

Óskemende alaıaq ıpoteka rásimdeýge kómektesemin dep 9 mln teńgeni qoldy etken

ÓSKEMEN. QazAqparat – Óskemen qalasynda ıpoteka rásimdeýge kómektesemin dep 9 mln teńge paıda kórgen alaıaq ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııaǵa habarlasqan 28 jastaǵy azamat ıpoteka rásimdeýge kómektesetindigin aıtqan alaıaqqa aldanyp qalǵanyn jetkizgen. Jábirlenýshiniń jeke derekterin alǵan ol banktiń mobıldi qosymshasy arqyly 3 mln teńge nesıe alyp, óz qaltasyna basqan.

«Sondaı-aq 51 jastaǵy qala turǵynynan osyǵan uqsas aryz tústi. Er adamnyń aıtýynsha, beıtanys bireý jyljymaıtyn múlikti satyp alý úshin ıpotekalyq nesıe alýǵa kómek kórsetemin dep onyń telefonyna ornatylǵan mobıldi qosymsha arqyly 6 mln teńge nesıe alyp, óziniń bank shotyna aýdarǵan», - delingen aqparatta.

Jedel-izdestirý sharalary barysynda polıtsııa qyzmetkerleri kúdiktini qolǵa túsirdi. 24 jastaǵy jergilikti turǵyn óz kinásin moıyndap otyr.

Qazirgi ýaqytta atalǵan fakti boıynsha QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary júrip jatyr.

Esterińizge sala ketsek, osyǵan deıin Shyǵys Qazaqstanda 26 jyl buryn jasalǵan qylmys ashylǵanyn habarlaǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT