Elde 2,6 mln gektar jer memleket menshigine qaıtarylady – vıtse-mınıstr
2022 jylǵy 25 mamyr 13:58

Elde 2,6 mln gektar jer memleket menshigine qaıtarylady – vıtse-mınıstr

NUR-SULTAN. QazAqparat – 2,6 mln gektar aýyl sharýashylyǵy jerin memleket menshigine qaıtarý jumystary júrip jatyr. Bul týraly Aýyl sharýashylyǵy vıtse-mınıstri Ábilhaıyr Tamabek aıtty, dep habarlaıdy QazAqparat tilshisi.

«Aýyl sharýashylyǵynda tabysty jumys isteý úshin ár gektar jerdi utymdy paıdalaný qajet. 2019-2021 jyldar aralyǵynda ákimdikter júrgizgen jumystardyń aıasynda 8,1 mln gektar paıdalanylmaıtyn aýyl sharýashylyǵy jeri anyqtaldy. Olar boıynsha mynadaı is-sharalar qabyldandy: 3,4 mln gektardy menshik ıeleri ıgere bastady; 2,1 mln gektar jer memlekettik menshikke alyndy; 2,6 mln gektar jerdi memlekettik menshikke qaıtarý boıynsha jumystar júrgizilýde», - dedi Ábilhaıyr Tamabek Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, aýyl sharýashylyǵy maqsatyndaǵy jerdi utymdy paıdalaný jáne aýyldaǵy halyqty aýyl sharýashylyǵy jerimen qamtamasyz etý problemasy barlyq óńirde ótkir másele bolyp tur.

«2022 jylǵy 3 qańtarda paıdalanylmaıtyn aýyl sharýashylyǵy jerlerin májbúrlep alyp qoıý merzimin 2 jyldan 1 jylǵa deıin qysqartý jáne memlekettik baqylaýdyń jańa tetigin engizý jónindegi norma qabyldandy. Paıdalanylmaı jatqan jerdiń 90 paıyzǵa jýyǵy shaǵyn kásipkerlik sýbektilerine tıesili ekendigin atap ótý kerek. Bul rette, erekshe jaǵdaılardy qospaǵanda, mıkro jáne shaǵyn kásipkerlik sýbektilerine qatysty tekserýlerdi júrgizýge moratorıı engizý týraly Prezıdent Jarlyǵyn buzyp, tekserýler júrgizý múmkin emes», - dedi ol.

Aıta keteıik, buǵan deıin jer zańnamasyn buzǵandarǵa 219 mln teńge aıyppul salynǵanyn jazǵan bolatynbyz.


Uqsas jańalyqtar

Jańalyqtar

Úrdis

MURAǴAT