Almatyda 12 myńǵa jýyq túlek úshin sońǵy qońyraý soǵyldy
2022 jylǵy 25 mamyr 13:57

Almatyda 12 myńǵa jýyq túlek úshin sońǵy qońyraý soǵyldy

ALMATY. QazAqparat - Almatyda bıyl 12 myńǵa jýyq oqýshy mektep bitirdi. Búgingi tańda megapolıste 287 jalpy bilim beretin mektep jumys isteıdi, onyń ishinde 207 - memlekettik jáne 80 - jekemenshik. 2021-2022 oqý jylynda 1-den 11-synypqa deıin bilim alǵan oqýshylar sany - 300 myńǵa jýyq, dep habarlaıdy QazAqparat tilshisi.

Alataý aýdanynyń №180 jalpy bilim beretin mektebiniń túlekterine arnalǵan merekelik shara ashyq aspan astynda ótti. Oqýshylardy quttyqtaýǵa muǵalimder, ata-analar men birinshi synyp oqýshylary keldi. Mektep dırektory Lázzat Dáýletbek túlekterge arnaǵan quttyqtaý sózinde mektep bitirý – jańa, qyzyqty, úlken ómirdiń bastaýy ekenin atap ótti.

«Memleket basshysy Qasym-Jomart Toqaev bıylǵy jyldy «Balalar jyly» dep jarııalady. Bul jyl - bolashaq urpaq úshin eń jaqsy jaǵdaıǵa qol jetkizý jónindegi memlekettik saıasattyń jalǵasy, Jańa Qazaqstan qurylysy jaǵdaıynda erekshe mańyzǵa ıe. Búgingi kún túlekter úshin qaıtalanbas, mańyzdy da mándi, tebireniske toly kún. Qurmetti ata-analar, oqýshylar, muǵalimder! Sizderdi oqý jylynyń aıaqtalýymen quttyqtaımyn. Bizdiń túlekterge tek jaqsylyq, barlyq bastamalarynda sáttilik pen aq jol tileımin», - dedi Lázzat Dáýletbek.

Aıtýynsha, 2021-2022 jyl mektep úshin jemisti jyl boldy. Oqýshylar aýdandyq saıystarda - 115, qalalyq - 95, respýblıkalyq - 54 júldeli orynǵa ıe boldy.

«Mektep oqýshylaryn zamanaýı formatta sapaly oqytý úshin barlyq jaǵdaı jasalǵan. Jańartylǵan kitaphana, dáliz, sport alańdary qoldanysqa berildi. Qaýipsizdikti qamtamasyz etý maqsatynda týrnıkettik júıe iske qosyldy. «Jasyl mektep» jobasy aıasynda mektep jylyjaıy salyndy», - dedi mektep dırektory.

Bıylǵy oqý jylyn №180 mektepte 3856 oqýshy aıaqtady. Al, búgin 112 túlek úshin sońǵy qońyraý soǵyldy.

«Búgin men tolqyp turmyn. Ustazdaryma bergen bilimderi úshin zor alǵysymdy aıtamyn. Men IT mamandyǵy boıynsha oqýǵa túskim keledi. Jaqyn ýaqytta maǵan Ulttyq biryńǵaı testileý tapsyrý kerek. Grantqa túsemin degen úmitim bar», - dedi mektep túlegi Ǵazız Súleımen.

Mektep bitirýshilerdiń óz muǵalimderi men ata-analaryna alǵys aıtý úshin daıyndalǵan qoıylymdary áserli boldy. Mekeme ujymy men on birinshi synyp oqýshylarynyń ata-analary balalarǵa sát sapar tilep, jyly sózderin arnady.

«Bul mektepte ashylǵannan beri oqydym. Búgin biz úshin qýanatyn ári muńaıatyn kún. Biz mekteppen qoshtasamyz. Ustazdaryma zor eńbek pen shydamdylyqtary úshin alǵys aıtqym keledi. Olarǵa myqty densaýlyq, sáttilik tileımin. Bizdiń túlekter ózderi qalaǵan oqý oryndaryna tússin», - dedi jas túlek Alýa Joldasbek.

Іs-shara sońynda túlekter ádemi qoshtasý valsin bılep, jınalǵandarǵa qýanysh syılady.

Eske salaıyq, Bilim jáne ǵylym mınıstrligi bıyl 170 myńnan astam túlek mekteppen qoshtasatynyn, onyń 8 myńnan astamy «Altyn belgi» tósbelgisine úmitker ekenin habarlaǵan bolatyn.


Uqsas jańalyqtar
Atyraý oblysynda mektep tapshylyǵy máselesi qalaı sheshilip jatyr
2022 jylǵy 10 tamyz 22:56

Atyraý oblysynda mektep tapshylyǵy máselesi qalaı sheshilip jatyr

ATYRAÝ. QazAqparat – Atyraý oblysynda jańa oqý jylynda úsh mektep ashylady. Bıyl taǵy bes mekteptiń qurylysy bastalady, dep habarlaıdy QazAqparat.

Oblystyq bilim basqarmasy basshysynyń mindetin atqarýshy Aınagúl Dúısekenovanyń málimetinshe, jańa oqý jylynda 200 mektepte alǵashqy qońyraý soǵylady.

Bilim ordalaryndaǵy sabaqqa 138 myńnan astam oqýshy keledi.

«Óńirdiń damý josparyna sáıkes, 2025 jylǵa deıin 48 jańa mekteptiń ǵımaraty kezeń-kezeńimen paıdalanýǵa beriledi. Bıylǵy oqý jylynda úsh mekteptiń qurylysy aıaqtalyp, paıdalanýǵa berý josparlanyp otyr. Oblystaǵy barlyq mektepte jóndeý jumystary aıaqtaldy. Jańa oqý jyly dástúrli formatta bastalady», -deıdi Aınagúl Dúısekenova.

Onyń aıtýynsha, Atyraý qalasyndaǵy 63 mekteptiń jóndeý jumystaryna 69,5 mln teńge bólingen.

Kúzgi-qysqy kezeńge daıyndyq kezinde ortalyq jylý qazandyǵyna qosylǵan 27 mekteptiń jylý júıesi gıdravıkalyq synaqtan ótkizilgen.

Al, 36 mekteptiń jylý qazandyǵy jylytý maýsymyna tolyq daıyn.

Oblystyq qurylys basqarmasy basshysynyń mindetin ýaqytsha atqarýshy Nurbergen Qusaıynovtyń deregine súıensek, bıyl bes mekteptiń qurylysy bastalady.

Oǵan respýblıkalyq bıýdjetten qarjy bólingen.

«Byltyr 4 mekteptiń qurylysy aıaqtaldy. Atap aıtqanda, Qyzylqoǵa aýdanynyń Mukyr aýylynda 424 oryndyq, Jylyoı aýdanynyń ortalyǵy – Qulsary qalasynda 580 oryndyq, Atyraý qalasyndaǵy «Bereke» shaǵyn aýdanynda 1 200 oryndyq orta mektep paıdalanýǵa berildi. Sonymen qatar, Inder aýdanynyń ortalyǵy – Inderbor kentindegi Kóktem orta mektebine 80 oryndyq japsarjaı salyndy. Al, bıyl respýblıkalyq bıýdjet esebinen bólingen qarjyǵa Atyraý qalasynda árqaısysy 600 oryndyq tórt mektep pen Inder aýdanynda 300 oryndyq mektep-ınternattyń qurylysyn bastaý kózdelip otyr, -deıdi Nurbergen Qusaıynov.

Qazir Atyraý qalasy men Jylyoı, Inder, Mahambet, Isataı aýdandarynda 7 mekteptiń qurylysy júrip jatyr.

Eske sala ketelik, buǵan deıin Atyraý oblysynda birinshi synypqa qabyldaýǵa 17 myń ótinish túskenin habarlaǵan bolatynbyz.


Memlekettik bilim berý granty ıegerleriniń tizimi jarııalandy
2022 jylǵy 10 tamyz 16:05

Memlekettik bilim berý granty ıegerleriniń tizimi jarııalandy

NUR-SULTAN. QazAqparat - 2022-2023 oqý jylyna arnalǵan memlekettik bilim berý granty ıegerleriniń tizimi jarııalandy, dep habarlaıdy QazAqparat Ulttyq testileý ortalyǵynyń baspasóz qyzmetine silteme jasap.

Tizimdi myna silteme arqyly júktep alýǵa bolady.


Almaty taýlarynda adasyp ketken aǵylshyn azamaty tabyldy
2022 jylǵy 10 tamyz 14:10

Almaty taýlarynda adasyp ketken aǵylshyn azamaty tabyldy

ALMATY. QazAqparat – «Chımbýlachka» shyńynda adasyp ketken aǵylshyn azamaty tabyldy, dep habarlaıdy QazAqparat tilshisi.

Almaty qalasynyń qutqarý qyzmetiniń málimetinshe, 9 tamyz kúni saǵat 21:08-de tótenshe jaǵdaılar departamentinen «Chımbýlachka» shyńynan túsip bara jatqan kezinde 1979 jyly týǵan Ulybrıtanııalyq Makogon Romannyń adasyp ketkeni týraly habarlama túsken.

«Іzdestirý jumysyna «Tuıyq sý» lagerinen ekıpaj jolǵa shyǵady. Saǵat 22:44-te qutqarýshylar adasqan adammen vızýaldy baılanys ornatqan (ol taýdyń arǵy jaǵynda boldy). Eki jaq kezdesý ornyna deıin qozǵalysty jalǵastyrǵan. Saǵat 00:30-da qutqarýshylar adasyp ketken adammen kezdesip, tómenge túse bastaıdy.

Saǵat 02:45-te olar «Shymbulaq» taý-shańǵy kýrortyna keledi. Munda aǵylshyn azamatyn áıeli kútip aldy. Sondaı-aq oǵan medıtsınalyq kómek qajet bolǵan joq»,- delinedi Almaty qalasynyń qutqarý qyzmetiniń habarlamasynda.


Jańalyqtar

Úrdis

MURAǴAT