600-den astam sheteldik Soltústik Qazaqstan oblysynda jumys isteýge ruqsat surady
2022 jylǵy 24 mamyr 20:50

600-den astam sheteldik Soltústik Qazaqstan oblysynda jumys isteýge ruqsat surady

PETROPAVL. QazAqparat – Bıyl Soltústik Qazaqstan oblysynda jumysqa turýǵa ruqsat alý úshin 600-den astam sheteldik mıgrant ótinish bildirgen, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, qazirgi ýaqytta óńirde 3259 shetel azamaty ýaqytsha turyp jatyr. Jyl basynan jumysqa ornalasýǵa ruqsat alý úshin 600-den astam mıgrant ótinish bildirdi. Olardyń ishinde 56 áıel úı qyzmetkeri, aspaz, kútýshi bolyp jumys isteýge kelgen. Eńbek mıgranttarynyń deni Ózbekstan, Tájikstan jáne Ázerbaıjan azamattary.

«Eńbek mıgranttaryna qatysty 277 ákimshilik quqyq buzýshylyq anyqtaldy. Sheteldik jumys kúshin zańsyz paıdalanǵany úshin Qazaqstannyń 15 azamaty jaýapkershilikke tartyldy. Sheteldikterdiń tıisti ruqsatsyz eńbekpen aınalysqany úshin QR Ákimshilik quqyq buzýshylyq týraly kodeksiniń «Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy» 517-babymen jaýapkershilik qarastyrylǵan», - deıdi SQO PD Kóshi-qon qyzmeti basqarmasynyń bastyǵy Talǵat Ábilov.

Jyl basynan tıisti ruqsatsyz jumys isteýge qatysty 54 quqyq buzýshylyq anyqtaldy. Zańdy buzǵandarǵa 25 AEK mólsherinde aıyppul salynady nemese 10 táýlikke deıingi merzimge ákimshilik qamaqqa alynady jáne el aýmaǵy sheginen ákimshilik jolmen shyǵaryp jiberý jazasy qoldanylady.


Uqsas jańalyqtar

Jańalyqtar

Úrdis

MURAǴAT