Bıyl Qazaqstan halqynyń 58 paıyzy gazben qamtylady – mınıstrlik
2022 jylǵy 24 mamyr 11:40

Bıyl Qazaqstan halqynyń 58 paıyzy gazben qamtylady – mınıstrlik

NUR-SULTAN. QazAqparat – 2021 jyly Qazaqstan halqynyń 57 paıyzy gazben qamtyldy. Bul týraly QR Energetıka mınıstri Bolat Aqsholaqov aıtyp berdi, dep habarlaıdy QazAqparat tilshisi.

«2021 jyldyń qorytyndysy boıynsha elimizdi gazdandyrý deńgeıi halyqtyń jalpy sanynyń 57,67%-yn qurady nemese 11 mln adam gazǵa qol jetkizdi. Jalpy, eldi gazdandyrý 2015-2030 jyldarǵa arnalǵan bas josparǵa sáıkes júzege asyp jatyr», - dedi Bolat Aqsholaqov Úkimet otyrysynda.

Sońǵy jyldary ishki gaz tutynýdyń kúrt ósýine jáne eldi odan ári úzdiksiz gazdandyrý úshin gaz tasymaldaý júıesin jańǵyrtý qajettiligine baılanysty mınıstrlik «Qazaqgazben» birlesip «Gazdandyrýdyń bas shemasyn» ózektendirip jatyr.

Bas shemany iske asyrý bıýdjet qarajaty, «Qazaqgaz» jáne QR zańnamasynda tyıym salynbaǵan ózge de kózderden júrgizilip jatyr.

«Bıyl eldi gazdandyrýdy damytýǵa mınıstrliktiń respýblıkalyq bıýdjetten 45,8 mlrl teńge bólindi. Sondaı-aq 2022 jylǵa arnalǵan respýblıkalyq bıýdjetti naqtylaý sheńberinde qosymsha 50,1 mlrd teńge qoldaý tapty. Nátıjesinde 133 jobany iske asyrýǵa 96 mlrd teńge qarastyrylyp, bul 146 myń adamdy nemese 93 eldi mekendi gazben qamtamasyz etýge múmkindik beredi. 2022 jyldyń qorytyndysy boıynsha josparlanǵan gazdandyrý deńgeıi – 58,43%», - dedi Energetıka mınıstri.


Seriktester jańalyqtary

Jańalyqtar

Úrdis

MURAǴAT