SQO-da balalar lagerine joldama 42 myń teńge turady
2022 jylǵy 23 mamyr 22:27

SQO-da balalar lagerine joldama 42 myń teńge turady

PETROPAVL. QazAqparat – Soltústik Qazaqstan oblysynda jazǵy demalys lagerleri 17 maýsymnan ashylady, bıyl joldama quny 42 myń teńge bolyp bekitildi, dep habarlaıdy QazAqparat tilshisi.

Petropavl qalalyq ákimdiginiń apparattyq keńesinde oqýshylardy jazǵy kanıkýl ýaqytynda lagerlermen qamtý, demalysty uıymdastyrý jáne saýyqtyrý máselesi qaraldy.

Bıyl Petropavlda ǵana 25,5 myń bala demalyspen qamtylmaq, sonyń 1,8 myńy – turmysy tómen, kóp balaly, múgedek otbasylardyń balalary jáne jetimder. Bul sanatqa jatatyn oqýshylarǵa lagerge joldama tegin beriledi.

Jalpy bıyl Soltústik Qazaqstan oblysynda joldama quny 42 myń teńge turmaq. Al jazǵy lagerlerdegi demalys 17 maýsymda ashylady.

Lagerlerde 4 saýyqtyrý maýsymy bolady, onyń árqaısysynyń 10 kúnge shaqtalǵan. Petropavl oqýshylary «Berezka» men «Dostyq» lagerlerinde demalady. Qazirgi ýaqytta bul nysandarda daıyndyq jumystary júrgizilip jatyr.

Petropavl ákimi demalys lagerlerin balalardy qabyldaýǵa aldyn ala daıyndaýdy tapsyrdy. Túrli aýrýlardy taratatyn kemirgishterge jáne shybyn-shirkeıge qarsy dárileý júrgizilýi qajet. 28 mamyr men 14 maýsym aralyǵynda tósek-oryn óńdelip, lagerlerdiń aýmaǵynda dezınsektsııa jumystary júrgizilmek. Sondaı-aq órtke qarsy sharalar da pysyqtalady.

Sondaı-aq bıyl demalys nysandarynda tereńdiktegi uńǵymalar temirden plastıkke aıystyrylmaqshy. Qazirgi ýaqytta lagerlerdiń ǵımarattarynda aǵymdaǵy jóndeý jumystary júrgizilip jatyr.

Buǵan deıin SQO-da az qamtylǵan otbasynan shyqqan 11 myńǵa jýyq balanyń lagerde tegin demalatynyn aıtqan edik, osy maqsatqa jergilikti qazynadan 71 mln teńge bólindi.
Seriktester jańalyqtary

Jańalyqtar

Úrdis

MURAǴAT