Atyraýda 2-qabattan qulaǵan eki jasar balanyń jaǵdaı aýyr
2022 jylǵy 22 mamyr 14:30

Atyraýda 2-qabattan qulaǵan eki jasar balanyń jaǵdaı aýyr

ATYRAÝ. QazAqparat – Atyraýda 2-qabattan qulaǵan eki jasar balanyń jaǵdaı aýyr, dep habarlaıdy QazAqparat.

Oblystyq balalar aýrýhanasynyń baspasóz qyzmetinen málim etkendeı, terezeden qulaǵan 2 jasar 16 mamyrdan beri aýrýhanada jatyr.

«Atyraý qalasynyń «Nursaıa» shaǵynaýdanyndaǵy kópqabatty úıdiń 2-qabatynan qulaǵan eki jasar bala aýrýhanaǵa saǵat 17:30-da tústi. Balanyń aýyr jaraqaty bar. Bas súıegi eki jaǵynan synǵan. Qazir patsıenttiń jaǵdaıy óte aýyr», -dep habarlady aýrýhananyń baspasóz qyzmeti.

Oblystyq tótenshe jaǵdaılar departamenti qoǵammen baılanys tobynyń aqparatyna súıensek, byltyr 2-7 jas aralyǵyndaǵy 5 bala terezeden qulaǵan.

«Byltyr terezeden qulap ketken balalardyń arasynda bir otbasynyń egizi bar. Eki bala qaıtys boldy. Al, 3 bala aýyr jaraqat aldy», -dep málim etti qoǵammen baılanys tobynan.

Departamenttiń mamandary balalardyń terezeden qulaý qaýpiniń aldyn alý úshin turǵyndarǵa túsindirý jumysyn júrgizip jatyr. Máselen, keshe, 21 mamyrda Atyraý qalasyndaǵy «Turǵyn úı qalashyǵy» shaǵynaýdanyndaǵy kópqabatty 46 úıdiń turǵyndaryna jadynama taratyldy.

Eske sala ketelik, budan buryn Atyraýda káriz quddyǵyna qulaǵan 2 jasar bala aýrýhanaǵa jetkizilgenin habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT